Opinión

O bico da lingua

*A Coruña, onte, hoxe, sempre


Un artigo de Francisco Xosé Rei García (19/12/2006)

A pasada semana A Mesa pola Normalización Lingüística presentou publicamente a enésima solicitude de execución da enésima sentenza xudicial que obriga o Concello da Coruña a empregar a forma galega como único topónimo oficial posíbel e a utilizar o galego como lingua cooficial na actividade institucional e administrativa diaria, nomeadamente nas relacións entre o Consistorio e as veciñas e veciños.

A sentenza que se solicita executar, datada no pasado mes de xullo, non é, como dicimos, a primeira: outras viñeron desde aquela histórica primeira en 1994, cando practicamente cuestionar o topónimo na Coruña era tabú e o hoxe embaixador no Vaticano desfrutaba na alcaldía dos seus días de viño e rosas, sen nin sequera imaxinar que tería que acabar fuxindo da súa Cidade-Estado pola porta de atrás, autopropulsado se cadra por pancadas amigas ou, cando menos, correlixionarias. Ai, que ingrata é a política!

Tampouco son todas as resolucións que compoñen o inzado rosario xurídico iniciado vai agora para 13 anos produto de instancias xudiciais sospeitosas de filogaleguismo ou protonacionalismo. Que A Coruña é nome de lei determinárono xa, por activa e por pasiva, institucións de tan ranzo avoengo como o Tribunal Superior de Xustiza de Galiza, o Tribunal Supremo ou o Tribunal Constitucional.

Todo isto é leria vella, pensarán moitas das persoas que nos lean. De acordo, respondemos nós. Mais é preciso falarmos dela, sacármola do adocermecemento ou do fastío que sobre ela pulula a cada pouco, como único xeito posíbel de que non caia no esquecemento, que sería tanto como dicir que os delincuentes gañaron a partida, mesmo que teña que ser no seu exilio romano. E cómpre facérmolo por todos os diñeiros públicos malversados polo Concello da Coruña todos estes anos, recurso tras recurso, a conta das contribucións das coruñesas e coruñeses; tamén daqueles que falan/falamos galego na nosa vida diaria e aspiran/aspiramos a vivir en galego na cidade na que queremos seguir vivindo e queremos seguir tendo por nosa. Porque A Coruña merece seguir sendo, como mínimo por outro millar de anos, Cabeza, Chave, Garda e Antemural do Reino de Galiza.

Voltar a Opinión
Ir á Portada