Novas

*Autos Lobelle e Azkar Lugo loitarán dende o xoves 25 polo Campionato de Europa de Clubs Campións de Copa
· Entre o 25 e o 28 de xaneiro Santiago será o escenario desta competición que o ano pasado conquistou o Azkar Lugo


Redacción 10 de xaneiro de 2007 No Campionato de Europa de Clubs Campións de Copa disputarase en Compostela coa participación de equipos do estado español, Portugal, Italia, Rusia e Kazajistan.

Onte tivo lugar o emparellamento dos equipos, polo que se coñeceu que o Azkar Lugo se enfrontará ao Spartak Shelkovo o xoves 25 ás 19 horas, mentres que o Autos Lobelle se medirá ao Aktyubrentgen (de Kazajistan) ás 21 horas. Ao día seguinte, venres 26, enfrontaranse Benfica e Spartak (19h), e Luparense - Aktyubrentgen (21h). Os equipos galegos volverán xogar o sábado 27: o Autos Lobelle ao Luparense ás 18.30h, e ás 20.30h, Azkar Lugo - Benfica. Os primeiros de cada grupo loitarán polo título, cuxa final se disputará o domingo 28 ás 18h.

A primeira edición desta competición disputouse en Murcia, e resultou vencedor o equipo local, El Pozo Murcia; o ano pasado esta Copa xogouse en Lugo, e tamén resultou vencedor o local, Azkar Lugo, polo que de continuar a tradición, "este sería o ano do Autos Lobelle", tal e como dixo, ao longo do acto desta mañá o presentador do mesmo, o xornalista Terio Carrera.

Santiago Domínguez, presente neste evento, lembrou que "o máis importante destes dous clubs galegos non é os títulos e os bos resultados que consiguen na elite, senón o gran traballo que están realizando na base, promovendo a práctica do fútbol sala a través das súas escolas". Xunto ao director xeral para o Deporte, asistiron ó presidente do Lobelle, José Antonio Lobelle; Manuel Portas, concelleiro de Deportes de Santiago; Pilar Souto, deputada de Cultura e Deporte na provincia de A Coruña.

Voltar á Portada
Ver anteriores