|
Publicidade
Contacto
Novas
Internacional
Opinión
Arquivo
Ligazóns
Anteriores
|
*Quintana
di que o 19-x se confrontan dous proxectos, o do PP de equiparar
Galiza con Ceuta e Melilla e o do BNG de pór ao País
na vangarda do debate territorial
Redacción,
30 de maio
2005. O
líder
do BNG
asiste á apresentación do manifesto “No Nome
da Esperanza, xa Vai” e acusa a
Fraga de xuntar á xente “non para falarlle dos seus
problemas, senón para meterlles medo”.
A
precampaña está a pór de manifesto que o 19
de Xuño se van confrontar nas urnas dous proxectos
distintos de país: o do PP que pretende equiparar Galiza
con Ceuta e Melilla e o do Bloque Nacionalista Galego que tenciona
colocar ao país na vangarda do debate territorial
actualmente en curso no Estado.
Nestes
termos pronunciouse esta mañá en Santiago o
candidato do BNG á presidencia da Xunta de Galiza, Anxo
Quintana, durante un encontro con xornalistas previo á súa
asistencia ao acto de apresentación do manifesto “No
Nome da Esperanza, xa vai”.
“A precampaña
está a clarificar cada vez máis as cousas”,
afirmou Quintana e engadiu: “Hoxe é evidente que a
política do PP e de Fraga Iribarne, en termos autonómicos,
leva claramente a dirección de intentar equiparar a Galiza
coas cidades autónomas de Ceuta e Melilla. Outórganlle
a Valencia o que lle negan a Galiza. Ese é o proxecto do
PP. O do BNG, en cambio, quer un cambio galego para desde Galiza
iniciar un novo tempo político para o noso país se
homologar ás nacións do Estado e estar á
vangarda do proceso territorial que se está a dar no Estado
español. E iso é o que nos xogamos o día
19”.
A precampaña está a revelar tamén
que Fraga “ten un pánico absoluto a perder”.
“O problema de Fraga é que non entende a vida
política sen o poder. Iso é o que o move, ese
pánico, a estar insultando todos os días e a estar
axitando a fantasma do medo. Ademais, Fraga fai continuamente unha
política de exclusión, de división, de bons e
maos. E eu creo que en Galiza pasa exactamente o contrario. En
Galiza non sobra ninguén. Por non sobrar non sobra nen
Fraga. O único que sucede é que ten que pasar á
oposición. E eu creo ademais que sería unha boa
aprendizaxe para el, agora quizá xa a unha idade tardía,
pero nunca é tarde para aprender. E penso que desde a
oposición vai ter que aprender a dialogar”, engadiu o
líder nacionalista.
Quintana lembrou que Fraga se
ten negado sistematicamente a dialogar para que en Galiza houbese
un traballo de iniciación para a constitución dun
novo Estatuto. Nese sentido, anunciou que “eu como
presidente si que lle vou dar a oportunidade de dialogar, a
oportunidade que el non me deu a min. E imos ter que
dialogar, porque el tamén é necesario para a
constitución dese Novo Estatuto de Nación que Galiza
precisa”.
O portavoz nacional do BNG considera que
Fraga debería pór fin á práctica de
criticar ao nacionalismo através dos medios e cando “eu
non estou presente”. “Se Fraga ten tantas cousas que
me dicer a min e ao BNG, que debata. Eu espéroo o primeiro
día de campaña, na TVG, sen censuras, en directo,
para que podamos falar de todas estas cousas, e para que mas poda
dicer á cara, e eu poda expresar a miña opinión,
el, a súa, e que a xente contraste. Contraste pareceres,
contrasta opinións, e que reparta por tanto razóns.
Que debata, que debata”.
A negativa a debater
explícaa Quintana na evidencia de que Fraga “non ten
nada que dicer, porque ten medo e porque non ten
alternativas”.
“COMPARTO O ESPÍRITO E
A LETRA DESTE ACTO”
Quintana expresou a súa
ledicia por tomar parte, desde o público, no acto de
apresentación do manifesto “No Nome da Esperanza, xa
Vai”.
“Comparto o espírito e a letra
deste acto. Penso que é moi bon que a cidadanía
participe en política. É un síntoma de saúde
democrática. Por iso me merecen moitísimo respeito
tanto as entidades cívicas ou as forzas políticas
que convocan actos como as persoas que acoden a elEs. Por iso
me parece inaceitábel que Fraga chame morralla aos que
convocan determinados actos e os que acudimos a eles.
Paréceme unha evidencia máis de falta de espírito
democrático, impropria dunha persoa que aspira a ser
presidente da Xunta de Galiza”, acrecentou.
O que
tamén merece a crítica de Quintana é a
atitude que Fraga “ten coa xente”. “Fraga xunta
a xente en determinado tipo de actos para despois non lle falar
dos seus problemas como cidadáns, senón para
meterlles medo. Fraga utiliza a xente como un pano de usar e
tirar. Fálalles da unidade de España, pero non
daquelas cousas que preocupan á xente”.
Voltar
a novas
Ver
anteriores
|
|