|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*ADEGA
participou na Conferencia Europea sobre a Natureza
Redacción
29 de setembro
2005
A Asociación para a Defensa Ecolóxica de Galiza
(ADEGA)
estivo presente na Conferencia Europea sobre a Natureza celebrada
do 21 ao 25 de setembro na cidade holandesa de Apeldoorn, baixo o
lema "As nosas paisaxes: espazo para a natureza,
oportunidades para a xente". A conferencia xuntou a
institucións, investigadores e asociacións de toda
Europa e foi organizada pola asociación holandesa
Natuurmonumenten que, con 900.000 socios e socias, é unha
das principais asociacións de defensa da natureza de
Europa.
Durante a conferencia foi lanzado o Manifesto de
Apeldoorn, promovido por Europarc, Eurosite, o Centro Europeo para
a Conservación da Natureza e o European Environmental
Bureau (EEB), a federación ecoloxista europea da que forma
parte ADEGA.
O manifesto de Apeldoorn lembra o compromiso
adoptado polos xefes de estado e de goberno da UE en 2001, no
cumio de Goteborg, de deter a perda de diversidade biolóxica
na UE antes de 2010. Sen embargo, as accións para atinxir
este obxectivo foron até hoxe insuficientes no conxunto de
Europa e nomeadamente en países como Galiza. O manifesto de
Apeldoorn, dada a importancia da biodiversidade para o benestar
humano, demanda maior compromiso e aposta por un enfoque proactivo
de conservación da natureza baseado na xestión dos
ecosistemas e a participación social.
A idea forza
do chamamento de Apeldoorn é a conectividade, entendida en
tres dimensións. A física: a conexión entre
as zonas de maior interese natural a través de corredores
ecolóxicos, particularmente relevante en países coma
o noso, cun medio natural tan fragmentado por núcleos de
poboación, vías de comunicación,.... A da
xente: a necesidade de incrementar o interese e a implicación
coa natureza dos pobos europeos, xerando oportunidades de emprego
e incentivando o desfrute ordenado do medio natural. E a conexión
entre práctica e política, para o que cómpre
integrar de forma efectiva os obxectivos de conservación da
natureza en todas as políticas públicas.
Nos
diversos talleres de traballo da conferencia abordáronse de
forma específica diferentes cuestións, algunhas de
especial importancia para a nosa terra, como o impacto negativo
sobre a biodiversidade da substitución de terras de uso
agrario tradicional por plantacións forestais, cómo
poden ser utilizados os fondos europeos para a creación de
corredores ecolóxicos ou o impacto potencial do cambio
climático inducido pola queima de combustíbeis
fóseis (carbón, petróleo, gas natural) sobre
a biodiversidade.
A Rede Natura 2000, a rede europea de
espazos naturais protexidos, recibiu unha atención especial
na conferencia, ao ser o principal instrumento de ámbito
europeo para a conservación da biodiversidade. O manifesto
de Apeldoorn reclama a súa ampliación e que se
tomen as medidas necesarias para a súa conservación,
incluíndo a preparación de planos de xestión
e de programas de vixilancia e seguemento. A proporción de
territorio protexido pola Rede Natura 2000 en Galiza, o 12, 1%, é
moi inferior á media española e europea. Case todos
os espazos galegos da Rede Natura 2000 carecen de planos de
xestión, están mal vixilados e son obxecto de
múltiples agresións ambientais.
Voltar
a novas
Ver
anteriores
|
|