*Quintana afirma que a súa imaxe debatendo con Zapatero sobre o autogoberno de Galiza é a imaxe do futuro

Redacción, 29 de abril 2005. “A imaxe dun futuro no que Galiza teña un presidente que lle fale de ti a ti ao presidente do goberno central”. “O PP e o PsdeG equivócanse agochando os seus candidatos porque a cidadanía quere escoitar as propostas que ofrecemos cada un”.
O Portavoz nacional e candidato á presidencia da Xunta, Anxo Quintana, declarou onte que o BNG é a única forza política capaz de rachar a “invisibilidade que a política galega ten dentro da política estatal” e que a imaxe que onte se puido visualizar no Senado a través do debate co presidente do goberno, José Luís Rodríguez Zapatero, “é a imaxe do futuro”.

“A imaxe que se produce do Portavoz Nacional do BNG falando co presidente do goberno sobre o autogoberno de Galiza é unha imaxe de futuro. A imaxe dun futuro no que Galiza teña un presidente que lle fale de ti a ti ao presidente do goberno central. É o único xeito de que Galiza teña unha presenza real e efectiva na política estatal”, explicou Quintana aos xornalistas antes do inicio da conferencia que , baixo o título “Modelo territorial do estado”, impartiu na facultade de Dereito da Universidade da Coruña.

O portavoz nacionalista amosouse convencido de que esa será a imaxe que se produza despois das eleicions do 19 xuño e cun presidente nacionalista “acadaráse que Galiza deixe de ser segundo plato no debate territorial e estea ao mesmo nível que Euskadi e Catalunya”.

O líder do BNG salientou que esta forza política foi capaz de rachar “a invisibilidade” do País dentro da política estatal, pois cando se fala de modelo territorial só se alude a Euskadi e Catalunya. “Acadamos colocar a Galiza dentro do debate cunha proposta de autogoberno propia para Galiza”.

Neste sentido, Quintana fixo fincapé na necesidade de “acostumarnos a que as necesidades de Galiza teñan que ser resoltas con propostas decididas polos galegos e con fórmulas ideadas dende Galiza e así é como entende o debate o BNG sobre modelo de Estado”.

ESTRATEXIA EQUIVOCADA

A preguntas dos xornalistas, Quintana cualificou de “equivocada” a estratexia eleitoral que están a seguir o PP e o PSdeG na precampaña. “Equivócanse escondendo aos seus candidatos porque a cidadanía quere escoitar aos aspirantes á presidencia da Xunta para poder tomar unha decisión práctica e cabal”, de aí, explicou, “que o BNG e eu como candidato nacionalista esteamos a dar a cara e en contacto directo coa xente”.

Quintana reprochou que Fraga siga agochado. “Voulle a contar cada hora que pase”, ironizou.

O candidato do BNG pronunciou unha conferencia-coloquio sobre o modelo territorial ante un centenar de estudantes aos que expuxo as propostas nacionalistas nesta materia. En concreto, Quintana referiuse á trascendencia de deixar resoltos tres asuntos no Novo Estatuto de Nación que propugna para Galiza : a financiación, a blindaxe de competencias exclusivas e a representación exterior do País.

Voltar a novas

Ver anteriores