*O BNG celebra a iniciativa da SER de organizar un debate, anuncia a intervención de Quintana e agarda que os partidos estatais fagan o proprio cos seus líderes

Redacción, 27 de abril 2005. Sobre Fraga: “Quen non está en condicións de debater, non está en condicións de gobernar”, di Quintana. O Bloque Nacionalista Galego celebra a iniciativa dunha emisora privada de ámbito estatal –a cadea Ser- de organizar un debate arredor das eleccións galegas de 19 de Xuño e anuncia a intervención nel do seu candidato a presidencia, Anxo Quintana.

O BNG e Anxo Quintana sempre estarán a disposición dos medios de comunicación para garantir o direito dos galegos e das galegas a teren toda a información posíbel a respeito das propostas das formacións políticas e a respeito das condicións nas que se apresentan a este proceso eleitoral os candidatos.

O BNG é a forza motor do cambio galego e, congruentemente con iso, é a forza que está a abandeirar a rexeneración democrática do noso país, que pasa inescusabelmente pola celebración de debates nos meios de comunicación entre os candidatos á presidencia.

A respeito das declaracións de Fraga das que se desprende a súa intención de non comparecer en debates, Anxo Quintana afirma que “quen non está en condicións de debater, non está en condicións de gobernar”. O portavoz nacional engade que “nunha democracia minimamente avanzada ninguén se pode agachar ao escrutinio e ao control da opinión pública”.

O BNG agarda que PP e PSOE comparezan tamén cos seus líderes no debate que mañá irá celebrar a Cadea Ser, no seu espazo informativo Hora 25 (apartir das 22.00 horas).

Voltar a novas

Ver anteriores