|
Publicidade
Contacto
Novas
Internacional
Anteriores
Opinión
ForoNOVO!!!
Arquivo
Ligazóns
|
*ADEGA
pide maior atención política e social para o monte
durante todo o ano
Redacción,
26 de agosto
2005
O balanzo de destrución deixado polos incendios no que
levamos de ano, especialmente en agosto, é un episodio máis
dun desastre anunciado e repetido. A Asociación para a
Defensa Ecolóxica de Galiza (ADEGA) demanda unha reacción
política e social enérxicas para que Galiza deixe de
ser o país dos 10.000 incendios anuais e o país da
Unión Europea, xunto co norte de Portugal, con maior
densidade de lumes forestais (1). Para pór fin a este
drama, a prevención dos lumes e o desenvolvemento rural
sustentábel deben pasar a ser obxecto da máxima
prioridade política e dunha permanente preocupación
social.
ADEGA solidarízase con todas as persoas que
sofreron danos por causa dos lumes e felicita aos traballadores e
traballadoras das brigadas de loita contra os lumes pola súa
intensa dedicación. Asemade, valora positivamente a
transparencia da nova Consellería de Medio Rural canto á
información sobre número de lumes e superficies
afectadas, que contrasta co esforzo do anterior Goberno autonómico
por ocultar e minimizar o grave problema dos incendios perante a
opinión pública.
ADEGA quere que se
multiplique o esforzo policial e xudicial na persecución
dos incendiarios. En Galiza houbo até o 14 de agosto 7.912
lumes, mais no que levamos de ano só se detivo a 63
incendiarios. Sen embargo, para ADEGA ver só a dimensión
delitiva do problema dos incendios non conduce á súa
solución. ADEGA propón un amplo Pacto social contra
os lumes e unha especie de "Plan Galicia" para os
montes, mais non un insustentábel plan de asfalto e de
formigón, senón un de promoción da xestión
ecoloxicamente sustentábel e de creación de emprego.
Non nos podemos permitir que a Xunta gaste en axudas para
silvicultura e ordenación dos montes arborizados o que
inviste nun quilómetro dunha estrada (2), ou de ter só
un axente forestal por cada 5.400 hectáreas, dedicados
todos agora á extinción de lumes, en detrimento da
vixilancia dos espazos naturais, da caza e da pesca fluvial.
O
novo Goberno bipartito ten que romper cunha política
curtopracista que nos levou dos 36.342 incendios de toda a década
dos 80, aos 93.800 da década dos 90 e aos 52.200 da
primeira metade desta década. ADEGA agarda que, a partir do
outono, se comece a aplicar o programa de Goberno asinado por
PSdG-PSOE e BNG no que se refire ao "deseño dunha
política integral de loita contra os incendios que abranga
a ordenación forestal, o estudo da causalidade, medidas
preventivas, de infraestruturas e de loita contra a degradación
do solo". Unha das primeiras medidas neste senso debería
ser a reforma e convocatoria do Consello Forestal, o órgano
de participación social na política forestal que até
agora nunca se reuniu.
Para ADEGA, unha nova política,
entre outras cousas, ten que priorizar os labores de prevención
durante todo o ano e impulsar accións como a repoboación
con especies autóctonas. Tamén é desexábel
a profesionalización de traballadores/as adicados/as á
loita e prevención dos incendios, con contratos indefinidos
no canto de temporais. Sen esquecer a educación ambiental,
a concienciación para unha maior colaboración cidadá
na persecución dos incendiarios ou o fomento do
voluntariado na vixilancia e recuperación dos
montes.
Concentración en Celanova (Ourense)
ADEGA,
xunto co Comité de Defensa do Monte Galego e asociacións
culturais locais, convocou unha concentración para mañán
sábado ás 12 h en Celanova baixo o lema "Ningún
lume sen castigo. Os incendios son crimes contra a nosa terra".
Ourense volveu ser novamente a provincia galega máis
prexudicada polos lumes.
Para máis infomación
chamar a Óscar Freire, vocal forestal de ADEGA (teléfono
639 444 426).
Notas:
(1). No período
1998-2002 houbo unha media de 54,73 incendios por cada 100.000
hectáreas de superficie forestal, 11 veces superior á
media do resto das comunidades autónomas. O mapa da Axencia
Europea de Medio Ambiente (AEMA), elaborado a partir de
observacións por satélite de lumes forestais no
período 1998-2002, amosa a forte incidencia dos lumes no
noso país. O mapa pódese baixar desta web:
http://dataservice.eea.eu.int/atlas/viewdata/viewpub.asp?id=788.
(2)
A Consellería de Medio Ambiente concedeu no ano pasado
axudas para o fomento da silvicultura e a ordenación de
montes arborizados por valor de 5,3 millóns de euros. Este
gasto equivale ao que, segundo o orzamento aprobado, custou
construír pouco máis dun quilómetro da vía
rápida do Morrazo, que sería innecesaria no marco
dunha política de transporte sustentábel.
Voltar
a novas
Ver
anteriores
|
|