*Apresentación do CD "Froita Madura" do Coro Lonxe da Terra de Barcelona

Redacción, 25 de maio 2005. O Coro Lonxe da Terra, decano dunha tradición coral que se remonta uns oitenta anos atrás, na longa historia da emigración galega en Cataluña, presenta hoxe esta froita madura, cultivada con esmero durante xornadas de esforzo colectivo, coa pretensión de aportar á posteridade un producto do seu tempo.

Será o domingo, 29 de maio de 2005, ás 19:30 h. no Centro Galego de Barcelona.

O Coro Lonxe da Terra, decano dunha tradición coral que se remonta uns oitenta anos atrás, na longa historia da emigración galega en Cataluña, presenta hoxe esta froita madura, cultivada con esmero durante xornadas de esforzo colectivo, coa pretensión de aportar á posteridade un producto do seu tempo.

Hai neste traballo diferentes bloques temáticos:
Terra (1 a 5),
Mar (7 a 10),
Ar (6 e 15),
Alén (11 a 14),
nos que inserimos, por unha banda, cinco obras do músico Ángel Barja (Ourense, 1938 - León, 1987), como modesta homenaxe a este magno compositor. Quixemos tamén prestarlle especial atención ás cantigas dos nosos trobadores medievais, das que ofrecemos cinco mostras, agrupadas en dúas modalidades: cantigas de terra adentro (1 e 2; con obras de Xohán de Requeixo e Don Dionís) e cantigas do mar (8 a 10; con obras de Martín codax e Mendinho). Para adentrármonos nestas últimas, engadimos a xeito de introducción unha obra (7) do mestre Roxelio Groba.

O derradeiro cadro fórmano tres versións de obras de alén nós (12 a 14; con arranxos corais sobre obras de Lennon/McCartney, James Hudson/Robert Sund, e un Espiritual negro). Cara a elas imos saíndo pola banda dos Ancares da man dunha peza tradicional raiana de Galicia, León e Asturias (11) que presentamos apoiada nun sinxelo murmurio de voces para mellor deixar ir toda a beleza arcaica da monodia popular. E xa, por fin, voltamos definitivamente á Terra ó lombo dunha pomba, “brincando no ar” (15).

Dúas das obras (7 e 13), gravadas no pasado, durante a celebración de senllas edicións da Xuntanza de Coros Galegos de Catalunya, están incluídas no CD como recoñecemento a todos aqueles que dalgún xeito contribuíron a que este evento se celebrase durante anos nun clima de fraternidade, vontade de rigor artístico e orgullo galeguista.

As imaxes que ilustran o libreto que acompaña ó disco foron realizadas polo pintor noiés Alfonso Costa e mailo fotógrafo Fco. Javier Alonso Peláez.

Esta homenaxe a Ángel Barja culmina unha serie catalana que comezou o día 27 de maio de 2000, no Auditorio Enric Granados de Lleida coa celebración da IV Xuntanza de Coros Galegos de Catalunya, na que tódolos coros participantes interpretaban obras do compositor. A este respecto cómpre mencionar tamén a edición en xullo de 2004, do CD León, por ti da Coral Virgen del Camino, de Barcelona, dedicado a Barja.

Historia do coro

Fundado no 1934, baixo a batuta do Mestre Antonio Castells. En principio o coro estaba integrado tamén polos corpos de baile e gaitas, anque, a medida que pasaron os anos, estes grupos fóronse independizando. Posteriormente sucedéronse 10 directores, ata chegar ó actual, César del Caño.

Entre as súas moitas actuacións podemos destacar as seguintes:

TEATRE DEL LICEU (Barcelona) Coros e Bailes de MARUXA, 1978
PALAU DE LA MÚSICA (Barcelona), 1959 e 1981

Ten editados, un disco de longa duración con cántigas tradicionais galegas: Cantares da miña terra, 1978. Dir.: Joan Martínez Pedra, un disco sinxelo de Habaneras: La Habanera en el folklore gallego, 1972. Dir.: José Ledo Suárez e a banda sonora da película Niebla al sol, 1951

Dende o ano 1997 participa na organización da Xuntanza de Coros Galegos de Catalunya, como membro da Coordinadora Coral Galega de Catalunya.

ANGEL BARJA IGLESIAS

Santa Cruz de Terroso (Ourense), 5 de outubro de 1938 – León, 12 de febreiro de 1987

Considerado como o compositor galego máis universal.

Realizou estudios de Filosofía, Psicoloxía e Teoloxía en Valladolid.

En 1954 comeza a súa actividade como compositor de música coral.
En 1967 viaxa a Italia, Suiza e Austria para ampliar coñecementos musicais.
En Roma toma contacto cos movementos de vangarda, especialmente a “ Nuova Consonanza”.
Profesor de Música, Literatura e Francés no Escorial e Astorga.
En 1972 instálase en León como director da Capilla Clásica e profesor do Conservatorio.
Articulista habitual en xornais e revistas; conferencias, cursos, asesoramentos…

É frecuentemente xurado de certames corais e de composición.

Estrea diversas obras de encargo en distintos lugares, especialmente no Festival Internacional de Santander, con intérpretes como The Scholars, Coul String Quartet, Cuarteto Janacek de Praga, Solistas da BBC de Londres, ademais de outros intérpretes españois e alemáns como Helmut Erb, Azcue, Pedro Espinosa, Coro Nacional, etc.

Músico de sólida formación con máis de quinientas obras. Escribiu música sinfónica, de cámara, para piano, para órgano e máis de douscentos títulos de música coral e vocal en castelán, francés, italiano, latín, galego, catalán e euskera.

Coa Capilla Clásica de León deu, ó longo de catorce anos, máis de douscentos concertos; para ela escribiu moitas obras, gran parte gravadas en disco.

Realizou diversos traballos musicolóxicos, especialmente transcricións de música barroca española. Becado, por concurso nacional, pola Diputación Provincial de León, para a investigación e realización do Cancionero popular tradicional en equipo con Miguel Manzano.

Entre os numerosos premios obtidos destacan:

1972: Premio nacional de composición, e Premio internacional de composición.

1981: Premio internacional de composición.

1982: Premio Cristóbal Halfter.

1984: Premio nacional de composición.

1985: Premio internacional da Real Academia de bellas artes de Granada.

Voltar a novas

Ver anteriores