Novas

*Galiza Nova reclama ao Alcalde de Betanzos que cumpra cun acordo plenario e retire os nomes franquistas do rueiro

Redacción 24 de outubro de 2006 Con motivo dunhas xornadas pola recuperación da Memoria Histórica coorganizadas polo Concello, Galiza Nova reclama ao alcalde o a retirada do rueiro dos nomes de persoeiros do franquismo e a Medalla de Ouro da Cidade e o título de Fillo Adoptivo a Franco.

A demanda de Galiza Nova foi recollida polo BNG, que levou a Pleno a moción en marzo de 2005. Daquela a iniciativa resultou aprobada cos votos a favor da coalición de goberno, a abstención de seis dos sete edís do PP e o voto en contra do último dos concelleiros conservadores. No debate da moción a voceira do PP equiparara ás víctimas da represión cos alzados, insinuando que había no rueiro xente que tiña responsabilidades directas na guerra civil, en alusión a Castelao, Bóveda e aos alcaldes e concelleiros asasinados polos golpistas no inicio da contenda.

Máis dun ano despois, e co acordo plenario obviado, o portavoz dos mozos e mozas de Galiza Nova en Betanzos, Henrique del Río, afirmou onte que “coma remate a estes actos en torno á Memoria Histórica o alcalde ben podía plantexar ao pleno ordinario deste mes renomear as rúas que recordan a pro-homes do franquismo e dar así cumprimento ao acordo plenario” para rendir “a mellor das homenaxes aos represaliados e asasinados”.

Para a Direción Local das mocidades nacionalistas, reunida na tarde do domingo, a razón do incumprimento radica no feito de que “o PSOE deu o seu voto favorábel á moción coma un xesto de esquerdas cara a galería e sen intención real de cumprilo”. E reclaman o cumprimento do acordo do Pleno do Concello “por resposabilidade e seriedade ante os acordos tomados validamente no Pleno, pero sobre todo por respecto e recoñecemento aos represaliados polo franquismo” no transcurso do declarado Ano da Memoria.

Voltar a novas

Ver anteriores