Publicidade
Contacto
Novas
Internacional
Anteriores
Opinión
Foro
Arquivo
Ligazóns
*Quintana
marca obxectivos para o Estatuto Galego: recoñecemento
nacional, competencias reforzadas, autonomía financeira e
pago da débeda histórica
Redacción
24 de xaneiro 2006
O vicepresidente da
Xunta, Anxo Quintana, falou onte de “catro obxectivos para
un escenario novo” arredor dos que haberá que centrar
a negociación do Estatuto galego: establecer os mecanismos
para que haxa un recoñecemento nacional de Galiza,
conseguir unha relación bilateral co Estado, un modelo de
financiamento que camiñe cara a suficiencia financeira e a
autonomía fiscal, e definir un plan de pago da débeda
histórica.
Con
estas catro cuestións enriba da mesa, Quintana amosouse
convencido de que “hai campo para o traballo, para o diálogo
e para o encontro”. O vicepresidente expresou a súa
satisfacción e o seu respecto para o acordo acadado co
Estatut catalán esta fin de semana, e dixo que con isto “se
abre un novo escenario para Galiza, o escenario que nós
desexabamos”. Neste “momento político
ilusionante que estamos a vivir”, emprazou ás forzas
políticas a non perder nin un minuto máis en opinar
sobre o que fan os demais: “Somos gobernantes, non
tertulianos, e non podemos estar na política estatal
unicamente para valora o que se fai dende outras comunidades”.
Quintana engadiu que “hoxe máis que nunca temos que
reclamar que Galiza sexa protagonista na dinámica estatal”.
Con este fin, dixo que “é necesario que
falemos do que queremos para nós e do que é bo para
Galiza” e considerou que, neste labor, tomar coma referencia
o Estatuto de Cataluña é un erro: “Queremos
máis autogoberno para Galiza, pero querémolo porque
con isto os galegos e galegas saen beneficiados, non porque o teña
Cataluña”.
Nestes termos, “con toda a
sinceridade e co maior espírito construtivo”,
emprazou a todas as forzas políticas a seguir neste camiño:
“Esquezámonos de Cataluña, esquezámonos
de Madrid e falemos de Galiza e do que é bo para os galegos
e galegas”. Aínda así, recomendou sacar unha
conclusión da experiencia: “Ser ambiciosos trae bos
resultados, e se nos empeñamos e traballamos con tenacidade
e con espírito construtivo, podemos conseguir para Galiza o
que nos propoñamos dende Galiza”. Na opinión
do vicepresidente da Xunta, avanzar neste propósito é
algo “que esperan de nós toda unha xeración de
galegos e galegas que nos están pedindo que actuemos sendo
conscientes da oportunidade que se nos presenta”.
Neste
novo contexto que agora se abre, o vicepresidente xa se puxo en
contacto con Alberto Núñez Feijóo, con quen
se reunirá mañá ás cinco da tarde para
empezar a debater sobre o proxecto estatutario.
Non
perder o tren
Quintana reiterou a súa chamada ás
forzas políticas para que Galiza “non perda o tren”,
para o que dixo que “temos que facer as cousas por nós
mesmos e canto antes”. De desaproveitar a ocasión,
“non só deixaríamos de conseguir algo, senón
que mesmo estaríamos en perigo de perder o que xa temos”,
engadiu en referencia a que Galiza goza hoxe da mesma
consideración de nacionalidade histórica que teñen
Euskadi e Cataluña. “Chegou o momento de que
reivindiquemos a nosa condición de nación para estar
tamén así ao mesmo nivel que Cataluña e
Euskadi, pero sobre todo para que sexamos capaces coma galegos de
escribir o Estatuto que nos fai falta”, acrecentou.
Estatuto de todos
O vicepresidente insistiu
unha vez máis en que é necesario o diálogo
conxunto entre todas as forzas políticas, “dende o
convencemento de que cada un ten cousas que aportar”. Fixo
tamén un chamamento para empezar o diálogo canto
antes, “sen perder un minuto”, porque “levamos
moitos meses perdidos, moitos meses que outros aproveitaron para
poñerse a andar”.
Considera tamén
Quintana que hai que centrar o diálogo arredor das
cuestións fundamentais do recoñecemento nacional, de
acadar máis competencias, e de definir o novo modelo
financeiro e o pago da débeda histórica. Non
obstante, quixo deixar claro que “eu non vou poñer
condicionantes nin límites ao debate”.
Na súa
opinión, “non é unha discusión que
Galiza é unha nación, é unha realidade”,
e amosouse convencido de que, de non proceder ao recoñecemento
nacional de Galiza, “significaría agora de facto
rebaixar o estatus autonómico”. Por iso, dixo non
renunciar a nada: “Eu non renuncio sequera a que o termo
nación apareza no preámbulo e no articulado. Non vou
enquistar nisto, pero penso que hai que ser ambiciosos”.
Por
outra banda, tamén ve agora o momento para traballar con
vistas a lograr unha nova relación co Estado, reivindicando
a bilateralidade, así coma “un marco competencial
reforzado e blindado de interferencias foráneas”,
porque “temos que ter capacidade de decidir sobre as
cuestións que nos afectan”. Chamou para isto á
“cooperación intelixente”, de cara a “deseñar
entre todos un Estado que empece a funcionar en rede”,
superando o concepto de “Estado artefacto” que
solucione os problemas de todos.
Voltar
a novas
Ver
anteriores