*A Mesa denuncia a “arbitrariedade” da concesión da licenza de TDT á Cadea Cope e considera que tal decisión supón “un duro golpe para a lingua galega”

Redacción, 23 de xullo 2005. A Mesa pola Normalización Lingüística critica que non se atendese ao nivel de uso do galego á hora de conceder as licenzas de TDT. Esta asociación considera “arbitraria” a decisión do Goberno en funcións favorábel á Cadea Cope, pois na práctica significa que esa non será unha cadea de televisión privada galega, senón a sucursal dunha televisión de ámbito estatal.

Ademais, “resulta eticamente reprobábel que un Goberno en funcións e sen apoio electoral nin parlamentario tome unha decisión de tal importancia para o futuro do país, só guiándose por criterios partidistas”.

A Mesa agarda que o novo Goberno procure as vías legais para anular esta concesión e que se garanta un proceso transparente e democrático, no cal se teña en conta de xeito relevante o uso da lingua galega. A asociación en defensa do galego dirixirase aos líderes do PSdG-PSOE e do BNG para lles transmitir as súas propostas nese sentido, ademais de solicitar ao Valedor do Pobo que supervise esta decisión arbitraria do Goberno en funcións.

Voltar a novas

Ver anteriores