Contacto
*A UNESCO destaca a importancia dos xogos tradicionais
Redacción 21 de decembro de 2006 No pasado mes de novembro reuniuse na localidade de Almaty
(Kazajstán) a Mesa Inter-gobernamental sobre os Xogos e Deportes Tradicionais. Este órgano da UNESCO, composto por delegados e representantes gobernamentais (estatais, nacionais e rexionais), por ONG’s e por Universidades, salientou a importancia dos xogos e deportes tradicionais, na promoción das diversidades culturais e na preservación das identidades culturais a nivel local, nacional e internacional.
Ademais, puxo de relevo o papel que a cultura en xeral, e os xogos
tradicionais en particular, xogan na construción nacional, rexional e
internacional, particularmente a través da comunicación intercultural, a
preservación da memoria e do patrimonio cultural e deportivo nacional.
Tamén se constata que os Xogos Tradicionais crean un impacto
significativo –entre outros- na cohesión nacional, polo respecto das
identidades das comunidades de pertenzas culturais distintas.
Do mesmo xeito, destacou a dimensión educativa, especialmente a
necesidade de transmitir o saber, afianzar o coñecemento, difundir e
compartir a información sobre o patrimonio lúdico dunha determinada
comunidade cultural como unha base para contribuír ao desenvolvemento e
á promoción dos xogos tradicionais entre as novas xeracións.
Asemade falou da relevancia da proximidade rexional, máis aló das
particularidades, con vistas a reforzar a cooperación e os intercambios
para desenvolver e promover os Xogos Tradicionais e reflectir mellor as
semellanzas, coincidencias e diferenzas, favorecendo o descubrimento, a
tolerancia e o respecto mutuo dentro da diversidade cultural para a paz
entre os pobos.
Entre as accións a poñer en práctica propostas pola Mesa Inter-gobernamental,
destacamos as seguintes:
1. Recomendase ás autoridades nacionais deportivas e ao
movemento deportivo nacional, que cooperen máis activamente en
promover e divulgar os Xogos e Deportes Tradicionais,
deseñando estratexias dirixidas á incorporación dos compoñentes
culturais e dos Xogos Tradicionais durante a celebración de
eventos deportivos a nivel nacional (por exemplo durante as
cerimonias de apertura) como un programa cultural sistemático.
2. Cada país iniciará un festival nacional de Xogos Tradicionais co
apoio dos Gobernos e axentes interesados. Do mesmo xeito,
debería de se promover un festival internacional destes xogos.
3. Os representantes dos Gobernos aproban e axudan ao
estabelecemento, baixo o liderado da UNESCO do Worldwide body
on TSJ para promover, desenvolver e asegurar o seguimento e
a harmonización dos esforzos, accións e experiencias en Xogos
Tradicionais, en vista de que a diversidade cultural encamiña cara a
paz e o desenvolvemento.
Voltar á Portada
Ver anteriores