|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*O
novo goberno vai estabelecer unha oferta educativa en galego para
os menores de tres anos
Redacción
20 de outubro 2005
Esta
medida da Secretaría Xeral de Igualdade complementa os
compromisos asumidos pola Consellaría de Educación
para que o curso próximo un mínimo do 50% da
docencia no ensino non universitario sexa en lingua galega.
Carlos Callón e María Xosé Jamardo, o
Presidente e a Secretaria Xeral da Mesa
pola Normalización Lingüística,
entrevistáronse esta mañá con Carme Adán,
Secretaria Xeral de Igualdade da Xunta de Galiza. Neste encontro,
Carme Adán manifestoulle á Mesa a súa
intención de aplicar plenamente, dentro das súas
competencias, o Plano Xeral de Normalización Lingüística
no ensino, o que significa, entre outras cousas, que se vai
estabelecer unha oferta educativa en galego no ensino infantil de
0 a 3 anos.
Tamén
se vai fomentar a adquisición progresiva da lectura e da
escritura en galego, na perspectiva de que este se converta no
idioma de base da aprendizaxe escolar. Ademais, A Mesa e a
Secretaría Xeral de Igualdade manifestaron a súa
disposición a colaborar na organización de xornadas
lúdicas destinadas tamén aos máis pequenos e
ás máis pequenas, para o cal manterán outro
encontro en próximas semanas.
Esta medida de
galeguización da educación preescolar, anunciada
nesta entrevista coa Mesa, complementa os compromisos asumidos a
semana pasada pola Conselleira de Educación nun encontro
con esta mesma entidade. Laura Sánchez Piñón
deu ordes para que este curso escolar se cumpra o Decreto 247/95,
que regula as materias mínimas a impartir en galego no
ensino non universitario. Ademais, marcou a vontade da Consellaría
para que o curso próximo haxa unha nova norma legal que
garanta que un mínimo dun 50% da docencia sexa en galego,
tal e como se aprobou consensuadamente por PP, PSOE e BNG hai un
ano.
A Mesa fai un chamamento a toda a comunidade educativa
para que se implique activamente neste proceso ilusionante que
significa facer avanzar o galego no ensino, posto que o proceso de
normalización lingüística significa unha
mellora na calidade xeral da educación en Galiza.
Voltar
a novas
Ver
anteriores
|
|