*Comeza Xpressate en Tui’06 como preámbulo de Play-Doc o Festival Internacional de Documentais de Tui

Redacción 20 de marzo 2006 Os seis traballos que participan presentan grandes expectativas artísticas. Os seis novos talentos escollidos por Play-Doc e Avid Technology para participar no taller Xpréssate en Tui’06 iniciaron o sabado pasado a súa semana de aprendizaxe nesta nova iniciativa que se estrea precisamente en Tui.

O obxectivo, segundo explicou Jose Ramón Rodríguez, Director Xeral de Avid-Technology, é “apoiar aos novos talentos até o éxito”. O responsábel de Avid no Estado esspañol e Portugal fixo un repaso aos obxectivos desta iniciativa cuxo último fin é “promocionar a obra pero tamén o que máis nos interesa é a persoa”, dicía.

Durante a fin de semana pasada, na aula montada na Área Panorámica os seis realizadores terán a oportunidade de aprender da experiencia de Fernando Pardo, recentemente galardoado cun Goya por “Habana Blues”, posteriormente, de luns a xoves, traballarán xa no seu propio proxecto editando un documental que non superará os cinco minutos, e que o sábado proxectarán dentro de Play-Doc no Teatro Municipal de Tui. O público será entón quen co seu voto decida quen é o gañador desta edición.

Jose Ramón Rodríguez, na súa intervención ante os medios de comunicación, tivo eloxios para Play-Doc indicando que “xa o ano pasado sorprendeunos gratamente” e engadindo que para a posta en marcha de Xpréssate produciuse unha perfecta simbiose entre Avid e os Directores do Festival tudense.

Para rematar Angel Sánchez, director de Play-Doc xunto a Sara García, indicou que “estamos xuntar sinerxias nun obxectivo común” engadindo que “pretendemos sacar á luz historias que merecen ser vistas e apoiar aos novos realizadores”.

Os seis mozos que participan en Xpréssate en Tui’06 explicaron brevemente a historia que presentarán no seu documental, destacando todas elas pola súa gran carga emocional.

Rafael Salazar trata o problema dos trastornos de aprendizaxe de nenos en “Cando as palabras bailan”, Nacho Cabana conta a curiosa historia dun loitador de loita libre que se converteu sacerdote en “Frei Tormenta, sacerdote e loitador”, “Nada” de Raquel Barreira experimenta co baleiro emocional e físico que produce a perda dun ser querido. O vigués Xacobo Sanmartín con “I love Teis” aborda o desaloxo de 500 vivendas neste barrio debido ao Plan Xeral de Urbanismo, pola súa banda Rubén Pardiñas desdramatiza os problemas territoriais co proxecto “Fronteiras” centrándose na fronteira Galiza e Asturias. Finalmente, Mónica Cortés achéganos ao duro traballo das pulpeiras en “O mundo polas mans”.

Voltar a novas

Ver anteriores