*Roteiro polas Carballeiras do Ulla (Vila de Cruces)

Redacción 20 de xaneiro 2006 Este domingo, día 22, a Asociación para a Defensa Ecolóxica de Galiza (ADEGA) organiza unha ruta polas beiras do Ulla, nun treito, correspondente aos concellos de Vila de Cruces por unha beira e de Touro pola outra, no que aínda se pode disfrutar de pasear entre carballeiras e bosque de ribeira, ademáis de apreciar o valioso patrimonio etnográfico dos muiños e pesqueiras que abundan no treito que que se vai visitar.

Merece a pena tamén ver a vella ponte de madeira que cruza o río á altura de Santomé de Obra e que ata o ano 96, no que se construíu unha ponte paralela de formigón, estivo aínda en uso.

Dende o punto de vista reivindicativo, este treito do Ulla está hoxe amenazado por dúas concesións hidroeléctricas do anterior governo en funcións que dende ADEGA, dende os veciños e dende os concellos de Vila de Cruces e Touro seguen insistindo en que teñen que ser anuladas. Esta é precisamente unha das razóns deste roteiro que organizamos conxuntamente cos veciños de Obra e Brandomés (Vila de Cruces): chamar a atención de AUGAS DE GALICIA sobre os compromisos anunciados polo Conselleiro de Meio Ambiente de anular estas concesións, sen que ata o momento, vencidos xa os prazos de contestación aos recursos de alzada, nada concreto se saiba ao respecto.

Trátase dun roteiro sen dificultade algunha por pistas e vellos camiños pola beira do río do que vale a pena disfrutar sen prisa.

Coma sempre o roteiro está aberto a todos e a todas os que gusten dun día ao aire libre.
O autobús sairá, -ao igual que en ocasións anteriores-, de diante da Escola de Maxisterio de Lugo ás 9 da mañá.

Apuntarse chamando ao 639.664924 (Montse).

Voltar a novas

Ver anteriores