|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*Rodríguez
afirma que o financiamento autonómico actual “cría
a ficción de que somos un País subvencionado”,
cando o estado “recada máis en Galiza do que logo
transfire á comunidade autónoma”
Redacción
20 de xaneiro 2006
O portavoz do BNG
no Congreso demanda a criazón dunha Axencia Tributaria
galega porque “para que haxa autogoberno ten que haber
autonomía financeira”.
O portavoz do BNG no
Congreso do Deputados, Francisco Rodríguez, defende a
criazón dunha Axencia Tributaria Galega que recade todos os
impostos da Galiza, xa que co actual modelo “a recadación
da axencia Tributaria no noso país é superior ao que
logo o Estado nos transfire para sustentar os gastos da comunidade
autónoma”, creando deste xeito a “ficción
de que somos un país subsidiado”.
Francisco
Rodríguez realizou estas declaracións nunha
entrevista á web nacional do BNG, que se pode consultar
integramente en www.bng-galiza.org.
Como
exemplo, a recadación tributaria do Estado (IRPF, imposto
de Sociedades, IVE, impostos especiais.....) na Galiza foi, en
2003, último ano disponíbel, de 7.662,3 millóns
de euros. O actual sistema de financiamento cédelle a
Galiza o 33 por cento do IRPF, o 35 por cento do IVE e o 40 por
cento dos impostos especiais.
Así, os ingresos
tributarios da Xunta de Galiza ascenderon no 2003 a 2.900,9
millóns de euros. A isto engádese a “solidariedade”
do Estado: 2.816,7 milllóns de euros procedentes do fundo
de suficiencia e do gasto en sanidade para que a Xunta poida
facerlle frónte ao mantimento da sanidade, o ensino e os
servizos sociais.
“É dicer, a recadación
fiscal do Estado Español en Galiza no ano 2003 dá
uns resultados duns 7.600 millóns de euros recadados co
actual sistema e , porén, as transferencias que fai o
Estado para suportar os gastos básicos da Xunta de Galiza
suman un total duns 5.700 millóns de euros, moito menos do
que recadan”, aclara Francisco Rodríguez.
Para
o deputado do BNG, isto “rompe a teoría de que somos
un pobo subsidiado e que recebemos a solidariedade do Estado, a
única maneira de manter a españolidade de Galiza”.
Pola contra, subliña que “somos as nacións que
conformamos o Estado as que o suportamos, e non
viceversa”.
PROPOSTA DO BNG
Frónte
ao actual modelo, Francisco Rodríguez defende un sistema de
financiamento “que nos dea autonomía financeira ao
Goberno autonómico, pois non pode haber autogoberno real
sen autonomía financeira”.
Deste xeito, a
proposta do BNG para o sistema financeiro de Galiza baséase
en tres pontos básicos: criazón dunha axencia
tributaria propia que recade todos os impostos de Galiza; que o
sistema tributario se adapte á realidade galega e sexa
progresivo, de maneira que pagen máis impostos os que
dispoñen de máis renda; e en terceiro lugar que
Galiza aporte unha cantidade proporcional para o mantemento do
Estado, en función da súa renda e PIB per
cápita.
Con este modelo, “a sociedade galega
non tería consciencia dunha sociedade subsidiada, senón
a consciencia dunha sociedade con capacidade e con potencialidades
e máis responsábel para tomar cartas nos nosos
propios asuntos e mellorar as nosas condicións de
existencia”, asegura Francisco Rodríguez.
Voltar
a novas
Ver
anteriores
|
|