Novas

*Secretario Xeral de Emigración recibe aos responsables de fillos.org
A delegación da Asociación Fillos de Galicia viaxa a Santiago para ofrecer a Manuel Luis Rodríguez a súa colaboración no ámbito de Internet

Redacción 19 de setembro de 2006 Manuel Casal Lodeiro, creador do maior portal da diáspora galega en Internet (Fillos.org), encabezará a delegación que se reunirá o xoves día 21 de Setembro co Secretario Xeral de Emigración. O obxectivo principal da reunión, segundo declararon os responsables desta organización, é obteren unha resposta á proposta de convenio presentada a Emigración hai sete meses, cuxo propósito é rachar coa falta de apoio e colaboración que caracterizou a súa relación coa Xunta ate o de agora.

"Estamos convencidos de que se realmente a Xunta quere axir en serio en Internet a prol dos nosos emigrantes, debe contar connosco, como principal punto de contacto", explica Casal Lodeiro. "Non o faceren é desperdiciar esforzo e diñeiro dos contribuíntes para tentar crearen desde cero o que nós levamos case dez anos construíndo", indica en referencia ao portal Fillos.org que conta xa con máis de 3.700 usuarios
rexistrados e cen mil visitas mensuais, en comparación co portal GaliciaAberta, creado no 2005 pola anterior administración galega e que o novo goberno segue a tratar de impulsar.

Na reunión programada para primeira hora do xoves, Fillos expoñerá ao Secretario Xeral a súa aprobación á existencia dun web institucional, pero solicitarán que o devandito web non lles vire as costas á rede de portais creados por esta asociación durante estes anos de inhibición institucional no ámbito de Internet, senón que conte con eles como vehículo para o contacto cos milleiros de emigrantes e descendentes que utilizan a cotío esta Rede para manteren os seus lazos con Galicia e mais a súa cultura.

A Asociación Fillos de Galicia acudirá á reunión cunha mensaxe clara: "Cremos que a Xunta non pode ignorar por máis tempo aos milleiros de internautas que nos xuntamos en torno a Fillos.org nin o esforzo que levamos realizando de forma pioneira e sen respaldo económico das
institucións", conclúen.

Voltar a novas

Ver anteriores