|
Publicidade
Contacto
Novas
Opinión
Arquivo
Ligazóns
Anteriores
|
*Quintana:
“este 17 de maio estamos ás portas dun cambio galego
que suporá o comezo dunha nova política cultural e
lingüística”
Redacción,
18 de maio
2005. O
BNG
louba o compromiso diario de todos os galegos que empregan a nosa
lingua con normalidade e promoven sen complexos o seu uso. O
portavoz nacional do BNG e candidato á Presidencia da
Xunta, Anxo
Quintana,
salientou onte en Santiago que este Día das Letras Galegas
“se dá nun contexto especial” porque o país
“está ás portas dun cambio galego que terá,
no ámbito cultural e lingüítico, unha
incidencia sobranceira” e suporá o comezo “dunha
nova política cultural e lingüística”.
Quintana,
alén do máis, loubou o compromiso diario de todos os
galegos e galegas que empregan “a nosa lingua con
normalidade e promoven sen complexos o seu uso” O líder
nacionalista expresábase así durante a lectura da
declaración do BNG con motivo da conmemoración do 17
de Maio, durante o acto celebrado no Panteón de Galegos
Ilustres en Bonaval, no que se fixo unha ofrenda floral a Castelao
e Rosalía de Castro.
Quintana proclamou que o
cambio galego suporá a “galeguización efectiva
do ensino, da Administración, da Xustiza, do mundo
económico, dos medios de comunicación e das
manifestacións relixiosas e deportivas”. Será
tamén “o comezo do respecto pola nosa toponímia
e o comezo da posta en valor das nosas industrias culturais”.
Para que o galego pase a ser a língua de uso cotián
en eidos que ata agora lle están cuasi vedados, o futuro
Goberno nacionalista comezará por facer cumprir o Plano
Xeral de Normalización Lingüística
estabelecendo “obxectivos, recursos e prazos”. O BNG
“renova o seu compromiso insubornábel coa lingua”
porque é grazas ao idioma “que existimos como nación,
que oferecemos ao mundo unha identidade propia, contibuíndo
de xeito orixinal e moderna á cultura universal”.
Ao acto asistiron todos os cabezas de lista, a maior parte
dos membros da Executiva Nacional, deputados, alcaldes do BNG e
meio centear de responsábeis políticos do
Bloque.
Reproducimos o comunicado íntegro a
continuación:
TORRES
E AMOR A GALIZA
Co
título dun dos poemarios máis coñecidos de
Lourenzo Varela, o BNG quer hoxe, no Día das nosas Letras,
renovar o seu compromiso insubornábel coa lingua e coa
cultura do país. Un compromiso asinado diariamente por
todos os homes e as mulleres nacionalistas que no mundo do
traballo, da empresa, do deporte, da criazón artística
e das institucións públicas empregan a nosa lingua
con normalidade e promoven sen complexos o seu uso.
Porque
a lingua, dicía Novoneyra, é a forma do país.
É pola lingua que existimos como nación
diferenciada. É por ela que podemos oferecer ao mundo unha
identidade propia, contribuírmos de xeito orixinal e
moderno á cultura universal.
Sen o galego non somos
nada. Co galego podemos aspirar a selo todo. A ser un país
plenamente normalizado. A ser un país que compartille co
resto dos pobos as súas riquezas culturais, a comezar polos
seu patrimonio e criazón máis xenuína, a súa
lingua propria. Co galego podemos aspirar a sermos recoñecidos
como o que somos, un pobo orgulloso de si mesmo e que ten aínda
moitas potencialidades que liberar.
Este 17 de Maio, día
das nosas letras, dáse nun contexto especial: estamos ás
portas dun cambio galego que terá, no ámbito
cultural e lingüístico, unha incidencia sobranceira. O
cambio galego, o país novo, arelado por unha ampla aioría
de galegos e galegas é, ten de ser, o comezo dunha nova
política cultural e lingüística. O comezo da
galeguización efectiva do ensino, da administración,
da xustiza, do mundo económico, dos meios de comunicación,
das manifestacións relixiosas e das deportivas. O comezo do
respecto pola nosa toponimia. O comezo da posta en valor das nosas
industrias culturais – audiovisual, editorial –
capaces de proxectarnos no mundo. O comezo, con obxectivos,
recursos e prazos concretos, do cumprimento do Plano Xeral de
Normalización Lingüística que o Parlamento
aprobou por unanimidade o pasado mes de Setembro.
O
cambio, para ser real, ten que ser un cambio en galego. Isto non é
só un slogan máis ou menos afortunado. Isto é
o que pensa a imensa maioría dos nosos compatriotas. O
cambio, para ser real, ten que vir de nós mesmos. E non hai
nada que nos sexa máis proprio, que nos remita máis
para nós mesmos, que a nosa língua, que a nosa
cultura.
Un cambio en galego significa aspirar a viver con
normalidade o que viven acotío outras sociedades nacionais:
viver todos os días da nosa vida, e non só nunha
data aillada no calendario, na nosa língua, viver todos os
días da nosa vida na nosa cultura, que por ser nosa poderá
comunícarse en ósmose gozosa coas outras culturas,
cos outros tesouros da Humanidade.
Imos facer o cambio en
galego. Non por fachenda, senón porque os do BNG estamos ao
servizo do pobo, ao servizo da xente, e o que a xente quer, o que
o pobo quer, é que honremos a memoria das xeracións
que nos precederon como a mellor garantía para gañarmos
o futuro.
Que honremos a memoria de Rosalía, de
Castelao, de Bóveda, de Curros, de Lourenzo Varela.
Eis
o noso compromiso, o dos homes e as mulleres do BNG, coa lingua e
a cultura de Galiza. Eis o noso compromiso cun país
novo.
Galiza, 17 de Maio de 2005
Voltar
a novas
Ver
anteriores
|
|