*Adenco organiza Proxectando en Verde, un ciclo de documentais ecolóxicos

Redacción 18 de abril 2006 O ciclo acada a segunda edición e volve a celebrarse no Centro Cultural Xinzo. A Asociación para a Defensa da Natureza do Condado, ADENCO, organizou para os próximos 21, 22 e 23 de abril a segunda edición do ciclo de documentais ecolóxicos Proxectando en Verde, que se volverá a realizar no Salón de Actos do Centro Cultural Xinzo, na parroquia ponteareá do mesmo nome.

“Con Proxectando en Verde pretendemos traer ao Condado documentais que non teñen normalmente cabida noutros espazos, xa sexa pola súa pouca difusión ou polas súas propias particularidades”, indicou Anxo F. Saborido, Presidente de Adenco.

O programa do Ciclo é o seguinte:
Venres 21 ás 20:30h: O pesadelo de Darwin.
Sábado 22 ás 20:30h: Félix Rodríguez de la Fuente: Vida e obra.
Domingo 23 ás 20:30h: 1990-1995: Cinco anos defendendo a natureza no Condado. O vídeo do nacemento de Adenco.

-O pesadelo de Darwin, un documental aconsellable para maiores de 13 anos, contén esceas duras pero reais sobre a introducción de especies alóctonas noutros Países e todo o que xira arredor do mesmo. Neste caso fame, guerra e tráfico de armas no corazón da África negra.

-Félix Rodríguez de la Fuente volverá a ser protagonista do ciclo cun documental sobre a súa vida e obra, realizada pola súa filla e que viu a luz recentemente. Peza clave para entender a concienciación ambiental do noso tempo.

-E 1990-1995 cerrará o ciclo. Unha proxección que nos traerá á mente os comezos, duros, dun Grupo Ecoloxista nunha vila como Ponteareas na que os problemas medioambientais pasaban desapercibidos. Por desgracia, moitos dos desastres que daquela denunciabamos seguen aínda sen resolverse.

As proxeccións serán no Salón de Actos do Centro Cultural Xinzo con entrada libre e gratuita.

Voltar a novas

Ver anteriores