|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*Luís
Tosar recebeu onte en Compostela o Premio Cineuropa
Redacción
16 de novembro 2005
O concelleiro de Cultura de Santiago,
Néstor Rego, comentou no momento en que se decidiu
outorgarlle o Premio Cineuropa 2005 a Luís Tosar que éste
representaba "unha xeración de actores galegos
implicados coa cultura e coa defensa dun cinema galego". E
certamente, o actor levou a cabo sempre unha traxectoria persoal
comprometida coa cultura e coa sociedade formando parte, por
exemplo, dos colectivos Burla
Negra e Nunca
Máis.
No momento no que o coñecido xuíz
de Mareas vivas (serie da Televisión
de Galicia) recibe este premio a súa
'internacinalización' é maior do que fora nunca, xa
que se atopa no medio da rodaxe de cadanseu filme de Clive Gordon
e Michel Man, Cargo e Miami vice, respectivamente.
Pero a presenza de Tosar para esta homenaxe xa está
confirmada nun acto no que ademais da presenza do actor o público
poderá gozar a estrea da longametraxe galego-alemá
Un día
en Europa: Galatasarai-Dépor, de Hannes Stöhr
e que non chegará aos cines comerciais ata febreiro de
2006.
Luís Tosar
Naceu en Lugo en 1971 e
durante os seus estudos de bacharelato comezou a intesarse pola
interpretación da man dun profesor de literatura. Pouco a
pouco foise introducindo no mundo do cine, en especial das
curtametraxes, da man do seu veciño e amigo Jorge Coira,
con quen rodou curtas como Contos de Alentraia: Tornabón,
As xoias da señora Bianconero ou O
matachín.
Pero Tosar non comezou a súa
experimentación interpretativa cinguíndose só
ao cinema, tamén formou parte como vocalista nun grupo de
rock que se deu en chamar Los Huana e constituíu xunto a
César Martínez Goldi o dúo de teatro,
musical e cómico The Magical Brothers.
En 1998
chegoulle o momento do éxito mediatico da man da serie
Mareas vivas, dirixida por Antón Reixa e onde
encarnaba ao xuíz da vila de Portozás. O éxito
da serie abriulle as portas do cine español e en 1990
recibía a súa primeira nominación aos Premios
goya como Actor Revelación pola longametraxe Flores
doutro mundo, de Icíar Bollaín.
Dende
entón tomou parte en máis de corenta películas,
entre curtas e longametraxes, e entre elas destacaron: Os
luns ao sol de Fernando León de Aranoa e coa que
gañou o Goya ao Mellor Actor Secundario; O lapis do
carpinteiro de Antón Reixa; Douche os meus ollos
de novo con Icíar Bollaín e co que gañou o
Goya ao Mellor Actor Protagonista e a Concha de Prata ao Mellor
Actor no Festival de Donosti; Inconscientes con Joaquín
Oristrell, Ciumes de Vicente Aranda; Leo de José
Luis Borau; Trece
badaladas de Xavier Villaverde; ou A fraqueza do
bolchevique de Manuel Martín Cuenca.
A
estrea, Galatasarai-Dépor
Un filme rodado en catro
cidades distintas (Moscova, Istambul, Compostela e Berlín),
no que se empregan oito idiomas diferentes nun exercio de
comunicación transcultural no que se empregan como excusa
unha serie de roubos e a final da Liga de Campións entre o
Galatasarai de Istambul e o Deportivo da Coruña.
Un
película que supón a segunda creación de
Hannes Störh (logo de ben acollida Berlin is in Germany)
e da que forman parte, entre o reparto galego actores tan
coñecidos, ademais de Luís Tosar, como César
Martínez Goldi, Miguel de Lira ou Mónica
García.
Os outros Premios Cineuropa
Os
Premios Cineuropa inauguráronse ás portas do século
XXI, en 2000, cun triple galardón do que se fixo entrega ao
director José Luis Borau, á actriz e presidenta da
Academia de Cine Marisa Paredes e ao distribuidor e produtor
vigués Emilio Baños.
En 2001 o Premio
Cineuropa volveu recaer nas mans dun actor, desta volta foi o
madrileño Juan Echanove, popular por series de Televisión
como Irmáns de leite, por películas tan
recoñecidas como a popular Madregilda e cunha ampla
traxectoria teatral.
De 2002 a 2004 os galardoados con este
premio foron: de novo un actor, o arxentino Federico Luppi; o
director Bigas Luna en 2003 e o veterano creador portugués
Manoel de Oliveira en 2004.
Publicado
en Compostela
Cultura.
Voltar
a novas
Ver
anteriores
|
|