*Máis de dez grupos de teatro afeccionado pasarán por Teatrofilia, a mostra do concello de Vedra

Redacción 16 de marzo 2006 O concello coruñés de Vedra converterase a partir de mañá, 17 de marzo e durante todo un mes na capital galega do teatro afeccionado da man de Teatrofilia, a mostra de teatro amador que se celebra por terceiro ano e abalado polo éxito das edicións precedentes.

Será A sesión de Gaspar, da Escola Municipal de Teatro Marisa Soto de Silleda, a que inaugure ás 21:15 este festival que se celebrará todos os venres, sábados e domingos ata o 8 de abril.

Dentro dos once días nos que se desenvolverá a mostra, tamén terá un oco o teatro profesional. Así, a compañía Talía Teatro presentará a súa obra Bicos con lingua, galardoada co premio María Casares ao Mellor Texto Orixinal, así como ao Mellor Actor Protagonista a Artur Trillo. Nesta peza, dirixida por Avelino González e interpretada por Trillo e Toño Casais, faise unha ácida, intelixente e moi divertida reflexión sobre a situación sociolingüística en Galiza.

Esta mostra, organizada pola Asociación Cultural Papaventos, traerá ao escenario da Casa da Terceira Idade de Vedra cada venres, sábado e domingo e ata o 8 de abril, unha representación de diferentes grupos afeccionados de toda a comunidade galega. Cunha media de douscentos espectadores por sesión, a organización agarda repetir o éxito das edicións anteriores.

O grupo de maior relevanza dentro da escena afeccionada como Ditea, a compañía de amateurs máis antiga de toda a comunidade autónoma, con máis de 45 anos de experienza, pasará polo auditorio vedrés o 26 de marzo con Melocotón en Xarope, unha adaptación da coñecida obra de Miguel Mihura.

Os aspectos máis innovadores desta edición de Teatrofilia maniféstanse a través da introdución das novas tecnoloxías nalgunhas das producións que conforman o programa. É o caso da obra Caricias, que se representará o 31 de marzo, do grupo municipal de Ames, que combinan o máis puro teatro cunha montaxe audiovisual. O director novel Abelardo Rendo proxectará o 8 de abril a súa curtametraxe Non vou..., que tamén fusionará con teatro e música en directo.

O grupo de teatro anfitrión, Andaravía, pertencente á Asociación Cultural Papaventos, tamén terá espazo na programación de Teatrofilia. Será este sábado 18, coa súa obra Bicos, que tras un ano con moi boa acollida nas máis de vinte representacións que realizaron, agarda unha boa acollida como “equipo local”. E que mellor teloneiros que o grupo municipal infantil, Abeloura Teatro. Xusto antes de Andaravía, as futuras promesas do concello de Vedra representarán A picadura da galiña.

Papaventos, que organiza esta mostra en colaboración co Concello de Vedra e a Asociación Cultural Ullán, pretende reforzar a presenza do teatro afeccionado dentro do ámbito cultural galego, que conta en moitas ocasións con poucos foros nos que manifestarse. Así, a intención é que Teatrofilia sexa un referente dentro do panorama teatral afeccionado da comunidade, e ao mesmo tempo ofrecer unha alternativa de ocio para os veciños e veciñas da comarca.

Esta asociación ven dende o ano 1988 tratando de promover o feito teatral no seu concello. Papaventos é a impulsora do nacemento de Teatrofilia no 2004, unha mostra que tivo unha excelente acollida nas súas dúas anteriores edicións, e que se convirte deste xeito nun dos máis importantes eventos culturais do concello, achegando dende toda Galiza esta arte a todos os veciños e veciños.

Voltar a novas

Ver anteriores