*Este xoves e venres Fest@ctiva adica ao Novo Circo a segunda semana de actividades

Redacción 16 de marzo 2006 esta fin de semana celébrase a segunda tanda do programa de actividades de ocio alternativo para a Mocidade Festactiva no Instituto Fontiñas en Compostela.

Nesta ocasión, a programación estará centrada no Novo Circo, unha das tendencias culturais máis en auxe entre a mocidade e xuventude galegas. Así, o xoves 16 e venres 17 impartiranse en horario de 22 h. a 01.00 h. obradoiros de malabares, impartido polo colectivo Alehop de Pontevedra, de Clown, impartido por membros da Compañía Galega de Clown Os Sete Magníficos máis Un (compañía oficial do Festiclown) e de equilibrio, no que o colectivo Mananzas de Ourense desvelará a os e as participantes as técnicas do monociclo, os zancos, o rulo americano, o arame e a bola de equilibrio.

O venres 17 terá lugar a actuación do grupo Revira7 do I.E.S. E. Pondal, que representará algúns fragmentos de “Así Fan Todas”, a montaxe teatral que están a preparar ao longo deste curso escolar. Tralos escolares, “A Noite Paiasa” achegará ao escenario de Fontiñas a dúas compañías galegas de novo circo: Peter Punk, cun espectáculo de malabares e clown e a compañía Pajarito, que combina varias vertentes do novo circo, como a maxia, o clown e o cabaré.

Despois da positiva realización das dúas noites adicadas á “Cultura do hip hop” que se realizaron o xoves e venres anteriores, a mocidade Compostelana e da Comarca teñen unha nova oportunidade de participar deste programa de ocio alternativo e especialmente de obradoiros innovadores como son os de clown e equlibrio. Estes obradoiros, como o resto de actividades de Fest@ctiva, son totalmente abertos e de balde.

A estas xornadas temáticas seguiralles o venres 24 de marzo Fest@cción, unha grande festa final na que se realizarán demostracións dos obradoiros impartidos e un concerto no que actuarán algúns dos grupos locais que ensaian en San Lázaro: Materia (rock duro), Sen nome (rock 70) e Mito Escrito, Pa la Peña e Bronquitis Crónica (hip hop), xunto a Non Residentz, un dos grupos máis sobresaintes da escena hip hop galega.

Fest@ctiva, organizado polo Departamento de Educación e Mocidade do Concello de Santiago de Compostela e xestionada por Coper@ctiva Cultural – Culturactiva S. C. G., pretende ofrecerlle á mocidade alternativas de ocio e culturais, cubrindo un oco que neste senso, existe nas políticas programáticas para a mocidade en Galiza.

Este programa propón unha alternativa á diversión estándar, basado na autoxestión do ocio da mocidade galega e conxugando formación, tempo libre e diversión. Festactiva promove outro xeito de facer festas, onde a xente é a verdadeira protagonista e tódolos participantes teñen un lugar nas demostracións e actividades finais.

Desde a organización animamos á participación de todos os mozos e todas as mozas a participar nesta actividade na que facer do seu ocio unha alternativa. Todas aquelas persoas que desexen máis información poden consultar o portal de internet www.culturactiva.org ou chamar ao telf: 981 58 28 36.

Voltar a novas

Ver anteriores