Novas

*A AV O Progreso e Moz@s organizan este domingo en Beluso o Festival de Nadal



Redacción 14 de decembro de 2006 A Asociación de Veciños O Progreso e o colectivo Mozas e Mozos están a ultimar a preparación do Festival de Nadal que ambas as dúas entidades celebrarán de xeito conxunto na Casa do Pobo de Beluso (Bueu). O evento terá lugar o vindeiro domingo, día 17 de decembro, a partir das 18.00 horas, con entrada de balde.

Os rapaces da Escola de Baile Tradicional de ‘Antoxo’ abrirán as actuacións da tarde interpretando varias pezas, entre as que se inclúen xotas e muiñeiras. A continuación intervirá a Coral Airiños de Aldán, mentres que as voces da Coral Polifónica de Beluso se encargarán de pechar o acto.

No transcurso do Festival sortearanse varios premios destinados a galardoar ós colaboradores das entidades organizadoras. Deste xeito, Mozas e Mozos de Beluso sacará o número do gañador do lote de Nadal, que deberá estar presente coa rifa para levar o premio. Pola súa banda, O Progreso sorteará dúas completas cestas de Nadal entre os socios do colectivo veciñal.

Mostra de traballos

A Casa do Pobo de Beluso acollerá ademais durante a fin de semana senllas exposicións dos traballos elaborados polos alumnos dos cursos de costura e de arte floral. A mostra poderá visitarse tanto o sábado 16 coma o domingo 17.

Voltar á Portada

Ver anteriores