Publicidade
Contacto
Novas
Internacional
Anteriores
Opinión
Foro
Arquivo
Ligazóns
*A
Mesa, Behatokia e Observatori piden ao Estado que cumpra os
compromisos adquiridos a través da Carta
Europea
Redacción
14 de marzo 2006 A
Mesa Pola Normalización Lingüística, Behatokia
(Observatorio dos Dereitos Lingüísticos do País
Basco) e Observatori de la Llengua Catalana reuníronse
con varios partidos políticos no Congreso dos Deputados
para lle pedir ao Estado que cumpra cos compromisos adquiridos a
través da Carta Europea. Á reunión asistiron
BNG,
EA, ERC, Na Bai, PNV, PSC, CiU e IC-V.
Os
representantes destas tres organizacións que traballan para
velar polos dereitos lingüísticos dos falantes de
galego, catalán e basco lembraron as recomendacións
da Carta Europea das Linguas Rexionais ou Minoritarias.
A
Carta Europea é un tratado internacional do Consello de
Europa ratificado polo Estado español, que entrou en vigor
en agosto de 2001. O Consello de Europa considera que é
necesaria unha transición lingüística no Estado
español, a partir do modelo aínda vixente baseado na
supremacía do monolingüismo castelán e cara a
un modelo plurilingüe.
O decano da Facultade de
Ciencias Xurídicas da Universidade Rovira i Virgili, Santi
Castellà, fixo unha introdución da Carta Europea. “O
informe do Comité de Expertos do Consello de Europa, así
como as recomendacións do propio Consello de Ministros de
dito organismo, poñen en evidencia os múltiplos
incumprimentos en que incorreu o Estado español”,
explicou Castellà. Segundo recordou o decano, o informe
conclúe: “É preciso duplicar os esforzos para
educar a poboación maioritaria castelán-parlante e
aos medios de comunicación estatais, coa perspectiva de
fomentar unha maior aceptación e respecto polas
especificidades das identidades rexionais como parte integrante do
patrimonio español”.
A Mesa pola
Normalización Lingüística
Os
representantes de cada unha das organizacións relataron a
súa situación. Carlos Callón, presidente da
organización galega A Mesa pola Normalización
Lingüística, explicou que en Galiza existe unha
lexislación que non garante máis alá de que
un terzo do ensino se produza en galego, “aínda así,
esta lexislación é incumprida de forma masiva”.
Callón denunciou que nin tan sequera os pais que queren
escolarizar os seus fillos e fillas en galego nos primeiros anos
ven garantido ese dereito. Por iso, o Consello de Europa insta as
autoridades competentes a desenvolver modelos educativos
esencialmente en galego. “Esta vulneración de
dereitos lingüísticos tan elementais non se debería
tolerar por máis tempo”.
Segundo o presidente
da Mesa, o galego é a lingua do Estado que, aínda
tendo unha vitalidade social moi importante, se encontra nunha
situación de desprotección institucional máis
acusada, o cal produciu unha alarmante caída de falantes
nos últimos vinte anos que non foi corrixida. “O
Comité de Expertos ademais de reiterar os problemas que
denuncia en xeral tamén para o catalán e o basco,
sinala particularmente para Galiza o grave problema do ensino”,
acrecentou.
Descarga o descurso
ao completo pronunciado por Carlos Callón premendo
aqui.
Behatokia (Observatorio dos Dereitos
Lingüísticos do País Basco)
En
defensa dos dereitos lingüísticos do País
Basco, falou Paul Bilbao, director de Behatokia (Observatorio dos
Dereitos Lingüísticos). O director salientou a
‘situación especial’ de Nafarroa. “A
‘zonificación’ coa que a administración
divide Nafarroa non ten lóxica”, Bilbao referiuse á
distribución de Nafarroa en zonas bascófona, mixtas
e non bascófona. “Mesmo o informe elaborado polo
Comité de Expertos e as recomendacións do Comité
de Ministros se refiren a este tema, recoñecendo que non se
entende que na zona en que máis falantes de basco hai o
euskara non sexa oficial”.
Paul Bilbao lembrou que é
necesario que haxa máis traballadoras e traballadores con
coñecemento do euskara, “así o corroborou o
Consello de Europa”. Por último, o director de
Behatokia aclarou que dos 13 compromisos adquiridos no ámbito
da xustiza “a administración só cumpriu
dous”.
Observatori de la Llengua Catalana
O
coordenador do Observatori de la Llengua Catalana, Josep Romeu,
pola súa banda, falou no nome da comunidade lingüística.
“O Comité de Expertos do Consello de Europa felicita
e valora como ‘admirábel’ o sistema educativo
de Catalunya, baseado na inmersión lingüística
e a non segregación do alumnado, e advirte de que os
modelos de València e das Balears non garante o nivel
mínimo de cumprimento da Carta Europea”, manifestou
Josep Romeu.
O coordenador do Observatori tamén se
referiu especialmente ao caso do Poder Xudicial: “O Comité
de Expertos do Consello de Europa considera que o Estado español
está a incumprir a Carta Europea ao non garantir de forma
suficiente que os cidadáns e cidadás poidan acceder
coa lingua catalá á administración de
Xustiza. O Comité de Expertos recomenda revisar a Lei
Orgánica do Poder Xudicial e repensar a exixencia de
capacitación lingüística ao persoal dos
xulgados”.
*Na imaxe de dereita a esquerda: Josep
Romeu, coordenador do Observatori de La Llengua Catalana; Carlos
Callón, presidente da Mesa Pola Normalización
Lingüística; Santi Castellà, Decano da
Facultade de Ciencias Xurídicas da Universidade Rovira i
Virgili; Paul Bilbao, director de Hizkuntz Eskubideen Behatokia
(Observatorio de los Derechos Lingüísticos).