*Preséntase en Santiago un novo proxecto político mapuche

Redacción 14 de marzo 2006 Aspira a constituirse en partido para reclamar a autonomía política desta nación en Chile. A Galería Sargadelos de Santiago acollerá hoxe, martes 14 ás 20:00h. a presentación en Galiza de WALLMAPUWEN (Compatriotas do País Mapuche), organización que aspira a constituirse próximamente en partido político chileno para representar os intereses dos habitantes desta nación indíxena.

Na súa Declaración de Principios, Walmapuwen entende como necesario conformar un proxecto político que dea resposta a “cuestión nacional” mapuche para o que reclamará no seu programa inmediato un Estatuto de Autonomía que contemple un goberno e un poder lexislativo no territorio da actual rexión da Araucanía. O novo partido, defensor do dereito de autodeterminación dos pobos, defínese como pluralista, laico e progresista e quere promover reformas democráticas no estado chileno ademais de abogar pola defensa dos sectores populares que padecen de exclusión social, política ou económica.

O acto, organizado pola Fundación Galiza Sempre, contará coa presenza de Victor Naguil, profesor, investigador e responsable de relacións internacionais da formación mapuche que se atopa en Galiza para manter contactos co BNG e con diversos representantes sociais e institucionais.

A fundación nacionalista continúa deste xeito o seu labor de intercambio e divulgación de diversas experiencias sociais e políticas latinoamericanas nunha conxuntura de especial interese polas transformacións que se suceden neste continente. O representante mapuche será presentado polo Director da Fundación e pola portavoz do BNG no Parlamento europeo.

Voltar a novas

Ver anteriores