|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*Municipais
07: o BNG constitúe o Comité Nacional Eleitoral para
levar o cambio galego aos concellos do país
Redacción
13 de
febreiro 2006
O Bloque
Nacionalista Galego vén de constituír o seu Comité
Nacional Eleitoral con vistas a preparar as eleccións
municipais de Maio de 2007 e co obxectivo de levar o cambio galego
a todos os concellos do País. A formación
nacionalista aspira a incrementar sustancialmente tanto o número
de concelleiros e concelleiras como de Alcaldías.
Constitúen
o Comité Nacional Eleitoral o secretario de Organización
da Executiva Nacional, Luís Obelleiro; o de Acción
Municipal, Roberto Mera; a de Propaganda e Imaxe, Cecilia Pérez
Orxe; e o de Finanzas, Luís Barcia.
O BNG está
convencido de que apartir de Maio de 2007 os concellos do país
acompañarán tamén o proceso de cambio galego
do que o nacionalismo é motor desde o Goberno da nación.
A formación nacionalista aspira a incrementar
sustancialmente tanto o número de concelleiros e
concelleiros como de Alcaldías. A percepción que ten
o BNG é que os veciños e as veciñas valoran
moi positivamente o traballo dos grupos municipais da organización
frentista porque entenden que a opción nacionalista é
a opción máis acaída para defender os seus
intereses nos seus respectivos concellos e para garantir que estes
xoguen un papel positivo no afortalamento do autogoberno nacional.
Entre os cometidos do Comité Nacional Eleitoral
atópanse os de analizar a situación política
en cada un dos concellos do país e elaborar un mapa de
obxectivos eleitorais co que os nacionalistas afrontarán os
comicios municipais. Na súa primeira reunión, o
Comité Nacional Eleitoral estabeleceu un plano de traballo
que inclúe un calendario de encontros con todas as
organizacións comarcais do BNG para definir os obxectivos e
a estratexia en cada Concello e o deseño de actos
preeleitorais nacionais e comarcais que se desenvolverán ao
longo do ano 2006. Para este traballo de diagnose e fixación
de obxectivos, os grupos municipais xa elaboraron nos últimos
dous meses amplos informes sobre a situación política
municipal, estratexia do BNG e perspectivas
eleitorais.
ALTERNATIVA DE TRANSFORMACIÓN
REAL
De acordo coa avaliación de Roberto Mera,
“o actual contexto político, a nosa presenza no
goberno galego e no goberno da Deputación da Coruña
e a boa valoración social que o noso traballo na Xunta e
nos concellos está recibindo supoñen unha motivación
engadida para as organizacións e os grupos municipais que
xa traballan con ilusión no reto das municipais de 2007”.
Mera conclúe que “a alternativa ilusionante,
de cambio e transformación real para os nosos concellos é
sen dúbida o BNG. Nos concellos nos que o nacionalismo non
ten responsabilidades de goberno, temos sido claramente a forza
política referente para os veciños desenvolvendo un
traballo de oposición serio, construtivo, responsábel
e eficaz. Agora, tralo cambio galego unha maioría de
veciños e veciñas queren e reclaman novos gobernos
municipais e nós asumimos con responsabilidade o noso papel
de alternativa e a nosa vocación de gobernar nos concellos
do País.”
Voltar
a novas
Ver
anteriores
|
|