*Jorquera afirma que “a vía galega debe ser a da plena equiparación de dereitos de Galiza con Euskadi e Catalunya”

Redacción 13 de xaneiro 2006 “As propostas galegas non poden ser un eco das de Andalucía ou Estremadura, porque iso significaría perdermos de feito a condición constitucional de nacionalidade”.

O coordenador executivo do BNG, Francisco Jorquera, considera que a vía galega cara o afortalamento do autogoberno nacional debe ser “a da plena equiparación de dereitos de Galiza con Euskadi e Catalunya”, como corresponde ao feito de “sermos nós tan nación como a que máis”.

Jorquera –que tomou parte hoxe, na Sede Nacional do BNG, nunha reunión con dirixentes do PNV e CiU para preparar a Asemblea que Galeusca celebrará o próximo día 25 de Xaneiro en Madrid- estima tamén que “as propostas galegas non poden ser un eco das que se fagan desde Andalucía ou Estremadura, porque iso significaría perdermos de feito a condición constitucional de nacionalidade”.

Através deste comunicado de imprensa, o coordenador executivo do BNG quer enfatizar que os procesos de reforma no Estado deben concretizarse “no pleno recoñecimento da existencia de realidades nacionais diversas no Estado, no pleno recoñecimento de que o Estado español é un Estado plurinacional e de que Galiza é precisamente unha das nacións que o integran”.

O recoñecimento do carácter plurinacional do Estado e, consecuentemente, o recoñecimento de que Galiza é unha nación ten perfecto encaixe nunha “leitura aberta, flexíbel e desprexuizosa” da Constitución española. “En varios artigos da Constitución española fálase da existencia de distintos pobos como suxeitos colectivos e estabelece unha clara distinción entre nacionalidades e rexións, sendo o conceito nacionalidade sinónimo de nación”, afirma Jorquera.

O coordenador executivo do BNG manifesta que non é posíbel avanzar cara un maior degrao de autonomía político se non é através dunha “plena autonomía fiscal”. “A consolidación dun espazo fiscal proprio de Galiza é fundamental se queremos progresar como país. Os dados máis recentes do chamadou Instituto Nacional de Estatística pon de relevo que co actual modelo de financiamento a economía galega se empobrece no contexto do Estado. A isto nos ten conducido a retórica da mal chamada solidariedade estatal: a diverxer cada día máis dos promedios de riqueza do Estado e a ver agudizada a nosa situación de dependencia”, alega Jorquera.

Neste sentido, o dirixente nacionalista non ve nas propostas catalás de incremento da autonomía fiscal nengún problema para Galiza. “Son propostas feitas para Catalunya, pero que nós non podemos deixar de ollar con simpatía, porque apontan na mesma dirección que a nós nos cómpre para cambiar o rumo e encetar o camiño da converxencia cos estándares medios de riqueza do Estado”.

Galeusca

A respeito de Galeusca, o coordenador executivo anunciou que o día 25 de Xaneiro, en Madrid, os líderes do PNV, Convergència Democrática de Catalunya, Unió Democrática de Catalunya e Bloque Nacionalista Galego –Josu Jon Imaz, Artur Mas, Durán Lleida e Anxo Quintana- farán unha importante declaración para fixar formalmente a súa posición sobre o actual momento político que se vive no Estado.

Galeusca aproveitará tamén esta Asemblea de Madrid –na que tomarán parte membros das Executivas e dos grupos parlamentares respectivos- para aprobar o Plano de Actuación da Plataforma para 2006.

Voltar a novas

Ver anteriores