*Quintana propón un salario social de inserción para mozos e a criazón de 20.000 vivendas protexidas

Redacción, 12 de maio 2005. “Os estudantes galegos irán votar, pese aos exames, para conseguir o cambio galego”, vaticina Ana Pontón. O portavoz nacional do BNG e candidato á presidencia da Xunta, Anxo Quintana, anunciou hoxe nun acto con 200 mozos e mozas que un futuro goberno nacionalista creará 20.000 novas vivendas protexidas durante a próxima lexislatura e que porá en marcha un departamento específico encargado de todos os temas de vivenda baixo a denominación de Consellaría de Habitabilidade e Territorio.

“Queremos facer da vivenda tema central da nosa futura actuación de goberno e xa anunciamos que imos facer menos estradas que non levan a ningures e gastaremos menos en cemento inútil para adicalo a vivenda”, salientou Quintana nun acto organizado por Galiza Nova e no que tamén participaron as candidatas pola provincia de A Coruña Ánxela Bugallo e Ana Pontón.

Esa cifra de vivendas, explicou, sería tanto de nova construción como de rehabilitación, “non en van temos o parque de vivendas abandonadas máis alto de Europa”. O líder nacionalista explicou que a redistribución de oportunidades é unha das características do cambio galego que propugna o BNG, “e algúns dos mozos e mozas deste país non teñen ningunha oportunidade de acceder a unha vivenda, isto hai que modificalo, e niso consiste o cambio galego”.

Simultaneamente a esta estratexia de vivendas protexidas, o candidato do BNG explicou que un goberno nacionalista poría en marcha “un servizo nacional de transporte” que conecte os milleiros de núcleos urbanos de todo o país entre si, para favorecer un adecuado asentamento da poboación.

“Isto é unha proposta totalmente distinta á que a diario nos ofrecen Fraga e Feijoo, convertidos no Santo Patrón do ladrillo profesional”, ironizou.

Quintana salientou que, a diferenza doutros responsábeis políticos, el conta coa credibilidade de ter posto en práctica con éxito, cando tivo responsabilidade de goberno, as propostas en materia de vivenda que agora defende.

MENOR EMANCIPACIÓN XUVENIL

As propostas programáticas do BNG para a xuventude foron expostas polo miúdo pola candidata número 4 pola Coruña Ana Pontón, quen salientou a necesidade de pór en marcha un salario social de inserción para os mozos que lles permita a estes sobrevivir mentres non se incorporen ao mercado laboral, sen verse obrigados a aceptar traballos que non están acordes nin coa súa preparación nin coas súas expectativas. As dificultades dos mozos e mozas de Galiza para achar un emprego digno e acceso á vivenda explican, alegou Pontón, “o menor índice de emancipación xuvenil de Galiza ao respeito do conxunto do Estado”.

Para Pontón, estes son algúns dos problemas ser resolver que figuran no debe de Manuel Fraga e asegurou que os estudantes irán votar “para acadar o cambio galego que defende o BNG, pese aos exames”, concluíu.

Voltar a novas

Ver anteriores