*Vieiros, A Nosa Terra, A Peneira, Galicia Hoxe e Tempos promoven unha asociación de medios en galego

Redacción 10 de novembro 2005 Esta iniciativa á que Arroutada Noticias tamén se suma (xa solicitamos información para a nosa adesión) pretende contribuír ao proceso de asentamento dos medios en galego cara a consolidar un espazo comunicativo no noso idioma e fomentar a súa presenza pública é o principal obxectivo da nova Asociación de Medios Escritos en Galego, AME, impulsada polas empresas editoras de A Nosa Terra, A Peneira, Galicia Hoxe, Tempos Novos e Vieiros. A entidade, que está en proceso de constitución, está aberta a calquera publicación do ámbito da información xeral que sendo editada no pais, estea realizada integramente en galego e que conte cunha periodicidade non superior a dous meses.

A AME nace co ánimo de defender os intereses das empresas que o compoñen e o seu afortalamento dentro do mercado dos medios no país, ademais de contribuír ao proceso de asentamento dos medios en galego de cara a consolidar un espazo comunicativo no noso idioma e fomentar a súa preseza pública.

Outro dos obxectivos é a profesionalización do sector, de xeito que as empresas se doten de estructuras sólidas que garantan a proxección de cada medio de cara a asentar a independencia económica, sostén imprescindible da liberdade de prensa. Entre as funcións da asociación está a representación do sector diante das administracións e promover iniciativas lexislativas e administrativas que promovan a prensa en galego.

Como obxectivos internos, a AME tenta debater colectivamente os temas de interese para o sector e o asesoramento para facer fronte aos problemas profesionais comúns, ademais do intercambio de coñecementos e información entre os seus membros.

Os socios fundadores consideran de grande importancia o papel do sector privado na normalización lingüística neste país, na medida en que estas publicacións son unha plataforma publicitaria cualitativa e cuantitativamente atractiva. Por outra banda, agardan o interese e a implicación das administracións públicas na promoción dos medios en galego, dada a importancia destes no proceso de normalización da lingua e do propio país.

Nova publicada en Vieiros.

Voltar a novas

Ver anteriores