*ADEGA organiza unha xuntanza popular en Foz contra a destruccion do litoral lucense

Redacción 10de marzo 2006 A Asociación para a Defensa Ecolóxica de Galiza reunirá o vindeiro sábado, 11 de marzo, ás 11.30 na Casa do Mar de Foz a tódolos sectores sociais da Mariña Lucense para demandar solucións ante as ameazas á que está sometida toda a costa luguesa, tanto urbanísticas como industriais.

Baixo o lema "Por un mar e unha costa de todos e para todos", ADEGA pretende reunir os sectores para debater sobre a problemática derivada da especulación urbanística e do futuro do litoral como espazo de valor paisaxístico e ambiental. Como primeiro exemplo de destrucción ambiental na Mariña Lucense está a ameaza da contrucción dunha granxa de cultivos mariños na localidade ribadense de Rinlo, promovida pola empresa ACUINOR, a que, de levarse a cabo, suporía a ocupación definitiva de 42.000 metros cadrados de espazo protexido e daría "carta branca" á instalación doutros parques futuros de tecnoloxía alimentaria no resto de costa galega.

Por outra parte, avaliarase a situación costeira desde a perspectiva urbanística, tendo en conta as posibilidades de "marbellización do litoral" promulgadas polas grandes empresas de construcción e axentes urbanizadores que ameazan coa ocupación total da nosa costa, sen ter en conta os aspectos medioambientais ou de protección da natureza e paisaxísticos. Neste senso, tamén haberá que analizar as consecuencias socio-económicas, xa que a especulación urbanística incrementará o prezo das vivendas na zona e fará que os lugareños non poidan acceder a elas.

Neste documento achegamos a carta de convocatoria da reunión que ADEGA remitiu ás asociacións locais da Mariña coa intención de xenerar un debate que serva de punto de partida para vindeiras ocasións.

Voltar a novas

Ver anteriores