*O Parlamento aproba a proposición non de lei do BNG de dar carácter institucional ao Día da Clase Obreira Galega

Redacción 10 de marzo 2006 Por unanimidade, os grupos instan á Xunta de Galiza a institucionalizar a data do 10 de Marzo. O Parlamento de Galiza vén de aprobar por unanimidade dos grupos unha proposición non de lei presentada polo BNG pola que se insta á Xunta a dar carácter institucional ao día 10 de marzo, Día da Clase Obreira Galega.

“O Parlamento insta á Xunta a sumarse expresamente aos actos do 10 de marzo, en conmemoración do que as organizacións sindicais galegas denominan Día da Clase Traballadora Galega e recoñecela como data de referencia de todos os esforzos e sacrificios que os traballadores e traballadoras galegas fixeron en 1972 individual e colectivamente para contribuír a traer pacificamente a democracia”. Así é na súa integridade o texto aprobado.

O deputado Fernando Blanco Parga foi o encargado de defender, no Parlamento de Galiza, a proposición non de lei do BNG finalmente aprobada por todos os grupos da Cámara. Na súa intervención destacou que os feitos acontecidos en 1972 en Ferrol “transcenden a historia e marcan un antes e un despois no sindicalismo” e lembrou que son un referente “dos esforzos colectivos da clase traballadora galega a prol da liberdade”.

Blanco Parga fixo un repaso dos sucesos conmemorados nesa data e puxo especial énfase no feito de que “34 anos despois, esta data siga a lembrar” e se teña constituído nunha “referencia”, ao tempo que cualificou de “feito de dignidade colectiva” recoñecer a importancia simbólica destes acontecementos no Ano da Memoria Histórica.

Fonte: web da CIG.

Voltar a novas

Ver anteriores