|
Publicidade
Contacto
Novas
Internacional
Anteriores
Opinión
Foro
Arquivo
Ligazóns
|
*A
MESA pídelle “seriedade” á Secretaria
Xeral de política lingüística
Redacción
10 de febreiro
2006
A
Mesa lamenta que a máxima responsábel da
política lingüística autonómica “non
teña credibilidade nin a mínima capacidade de
decisión”. A Mesa pola
Normalización envíalle unha “carta urxente”
a Marisol López pedíndolle “que faga o seu
traballo” e deixe de dar “un espectáculo
penoso”. Presións do sector duro do PSOE fan recuar
tamén o compromiso de realizar unha campaña de
sensibilización social sobre o topónimo “A
Coruña”.
A Secretaria Xeral de
Política Lingüística, tras recibir presións
internas do sector máis intransixente co galego dentro do
PSOE, comunicou publicamente que o seu departamento non vai
facer nada para que se cumpra a Lei de Normalización
Lingüística no Concello da Coruña. Marisol
López recúa no proxecto que lle transmitiu aos
dirixentes da organización en defensa do galego segundo o
cal ía realizar unha campaña cidadá
sensibilizadora sobre o topónimo xenuíno e único
oficial.
Séguese,
así, o mesmo esquema que coa medida de realizar en galego a
proba tipo test das oposicións, que foi retirada debido ás
presións contrarias ao noso idioma por parte dun sector do
PSOE. A Mesa móstrase “moi preocupada” por este
xeito de actuar, que entende a política lingüística
como simple propaganda, mais que impide calquera adianto para o
galego, por mínimo que este sexa. Así mesmo, A Mesa
agarda que non se “dea marcha atrás tamén nos
compromisos para o ensino, aínda que sobre eles tamén
se posicionou dun xeito firme a Conselleira de Educación”.
Estas
actuacións supoñen “unha tomadura de pelo
colectiva” para todas as persoas e institucións que
actuaron xenerosamente na elaboración do Plan Xeral de
Normalización da Lingua Galega, aprobado por unanimidade no
Parlamento galego. A Mesa ve tamén que o “acordo de
Goberno entre PSOE e BNG, no referido á lingua, non se está
a cumprir”.
O Presidente da Mesa, Carlos Callón,
envioulle unha “carta urxente” a Marisol López
esta mañá para lle pedir que “faga o seu
traballo” e deixe de dar “este espectáculo
penoso”. O dirixente da asociación en defensa do
galego reiteroulle “a vontade construtiva que ten A Mesa de
colaborar coa Secretaría Xeral de Política
Lingüística” e que lle “produce unha
profundísima tristeza ver que vostede [a Secretaria Xeral]
non só non cumpre cos seus cometidos, senón que
está preocupada porque se saiba que non vai cumprir coas
súas obrigas”. Pídelle tamén que
“reflexione profundamente sobre o cargo que ocupa” e
que “dea explicacións públicas sobre estes
graves pasos atrás”.
Transparencia no
convenio coa Confederación de Empresarios
Marisol
López deu a entender tamén que, contrariamente ao
indicado pola Mesa á saída da súa entrevista
con ela, a Secretaría Xeral aínda non tiña
decidido asinar un convenio coa asociación da patronal
galega. A Mesa, que en ningún momento dixo que tal convenio
se asinase xa, lamenta que a Secretaria Xeral de Política
Lingüística sexa unha persoa “sen credibilidade”
e “sen palabra, que é un dos peores defectos que pode
ter un gobernante”. Fronte ás terxiversacións
da Secretaria Xeral, cómpre recordar o comunicado de
imprensa enviado aos medios de comunicación o pasado 13 de
xaneiro e que se pode consultar na páxina web da Xunta
(http://www.xunta.es/noticia?id=1301lingua).
Marisol López sostivo daquela: "Estamos á
espera de que a Confederación de Empresarios nos
presente un proxecto de normalización que vai englobar a
todos os seus asociados e que contará coa nosa
axuda técnica e económica, cunha partida non
inferior aos 750.000 euros". Isto é, tal e como
nos transmitiu tamén na reunión da pasada segunda
feira, tomouse a decisión de asinar este convenio non só
antes de ter unha planificación para o 2006, senón
mesmo antes de que a CEG lle presentase á Xunta o seu
proxecto de traballo.
A Mesa agarda que este proxecto teña
“resultados” e só pide “que haxa a luz e
taquígrafos necesarios nun acordo que significa non só
unha viraxe na política de axudas desenvolvidas até
agora, senón que move un montante económico tan
relevante e que pode significar a exclusión das axudas á
galeguización para as empresas que non estean dentro da
CEG”.
Voltar
a novas
Ver
anteriores
|
|