*O BNG trasládalle a XX.AA.as súas propostas en materia de competencias sobre agricultura e gandeiría para o novo Estatuto

Redacción 09de marzo 2006 Roberto Mera e Luís Barcia tamén defenderon ante os representantes do sindicato a necesidade da participación directa de Galiza na Unión Europea para as cuestións de tipo agrario. O texto articulado de Estatuto que propón o BNG contén competencias exclusivas para Galiza nas materias de agricultura e gandeiría "incluída a xestión dos fondos europeos que nesta materia correspondan a Galiza e a transposición das normas europeas de regulación dos mercados correspondentes". Así llelo transmitiu ao sindicato Xóvenes Agricultores unha delegación da Executiva do BNG, formada por Roberto Mera, responsábel de Política Municipal e Luís Barcia, responsábel de Finanzas.

Mera e Barcia tamén lle explicaron aos representantes de Xóvenes Agricultores (Manuel Fontela, vicepresidente, Francisco Bello Bello, secretario xeral técnico, Tomás Díaz, secretario organización, e a presidenta da Asociación de Mulleres e Familias de Ámbito Rural, Dulce Iglesias) as cuestións relacionadas coa presenza da Administración galega na Unión Europea. En concreto, a proposta estatutaria nacionalista sinala a representación directa con voz e voto nos Consellos de Goberno da UE para asuntos que teñan que ver coas competencias exclusivas de Galiza ou que afecten sectores estratéxicos, incluíndo a agricultura, gandeiría e política forestal.

O BNG transmitiulle a Xóvenes Agricultores a vontade de que esta organización, como en xeral todo o tecido asociativo galego se implique no debate sobre o Novo Estatuto. Roberto Mera valorou e agradeceu "a receptividade e o interese que este sindicato amosa en participar neste proceso coas súas propias propostas".

Voltar a novas

Ver anteriores