*Presentado o II Premio de artigos xornalísticos normalizadores Concello de Carballo

Redacción 08 de marzo 2006 O alcalde de Carballo, Evencio Ferrero, e a concelleira de Cultura, Belén Lendoiro, presentaron o II Premio a artigos xornalísticos normalizadores Concello de Carballo 2006. A iniciativa, da que participa o Servizo de Normalización Lingüística do Concello e varios medios de comunicación, persegue promover a reflexión sobre a situación social da lingua galega, crear espazos nos xornais para analizar a situación social da lingua galega e promover o uso do galego na prensa escrita.

Poderán participar neste concurso de xeito individual todas aquelas persoas que o desexen, cun único artigo que será inédito e deberá estar escrito en galego seguindo a normativa oficial. As bases do concurso pódense descargar aquí e mais no apartado de convocatorias.

O alcalde de Carballo, Evencio Ferrero, manifestou que "é importante que os proxectos pioneiros teñan continuidade e esperemos que se supere o éxito da anterior edición". Nesa primeira edición participaron 28 persoas, e o nivel dos artigos foi moi elevado. Olga Patiño Abeixón e Xurxo Fernández Carballido acadaron os dous primeiros premios que, que se incrementan este ano na contía económica. Ademais de publicar os artigos gañadores do II Premio a artigos xornalísticos normalizadores Concello de Carballo 2006, colaboran na iniciativa A Nosa Terra, Diario de Bergantiños, La Opinión de A Coruña, A Peneira, Galicia Hoxe, La Voz de Galicia, Tempos Novos, e Vieiros.

Voltar a novas

Ver anteriores