|
Publicidade
Contacto
Novas
Internacional
Anteriores
Opinión
ForoNOVO!!!
Arquivo
Ligazóns
|
*Jorquera
di que para o BNG o esencial é conseguir un “bon
acordo para o País” e enfatiza que o programa do
bipartito se fará “con transparecencia, luz e
taquígrafos”
Redacción,
07 de xullo 2005.
“Queremos un acordo á maior brevidade posíbel,
mais as présas nunca son boas conselleiras e non é
positivo traballar baixo a presión de datas límites”.
O coordenador executivo do Bloque Nacionalista Galego, Francisco
Jorquera, declarou esta mañá que o obxectivo básico
da formación nacionalista nas actuais conversas co PSOE é
conseguir “un bon acordo para o país”.
“O
que pretendemos é un bon acordo para o país. A
resultante das conversas será, en todo caso, unha
resultante con luz e taquígrafos. Queremos un programa de
Goberno o máis preciso e concreto posíbel e queremos
que todo isto se faga cunha enorme transparencia”, en
beneficio do interese xeral, afirmou o dirixente nacionalista no
transcurso dunha entrevista na Televisión de
Galiza.
“Estamos
na fase de intercambio de propostas e de negociación das
diferenzas que eventualmente podan ir xurdindo”, explicou
Jorquera, quen avanzou que a estas alturas “non hai aínda
acordos programáticos concretos”.
“Nunha
primeira fase, abordaremos o programa do Goberno bipartito. Será
nun segundo estadío cando analisemos a estrutura do Goberno
e o organigrama máis acaído para a Xunta de Galiza”,
acrecentou.
Jorquera salientou que o BNG desexa que o
acordo se produza canto antes, mais tamén reflexionou sobre
o feito de que as présas nunca son boas compañeiras.
“É preciso unha negociación seria para
concertar un bon acordo. Temos que traballar sen a presión
de datas límites. E na perspectiva de conseguir un acordo
satisfactorio que permita que canto antes se materialicen os
desexos de cambio e de respecto polo país expresados pola
cidadanía o 19 de Xuño”, subliñou.
FUNDOS
ESTRUTURAIS
Interpelado por Tino Santiago a respeito da
hipótese de que o Goberno bipartito teña que
xestionar o país sen os fundos estruturais, Jorquera
considerou a este respeito que “é necesario, e aí
o Goberno galego terá tamén algo que dicer, que o
Goberno do Estado desenvolva unha acción política
para que Galiza continúe a ser receptora deses fundos”.
“O
grande fracaso do PP nestes 16 anos de Goberno foi ter
desaproveitado a enorme dispoñibilidade de diñeiro
que tivo a oportunidade de xestionar. Non soubo utilizar estes
recursos para lograr que Galiza converxese en riqueza nen coa UE
nen co Estado español. E quero lembrar que se se dese esa
circunstancia (que Galiza deixase de ser rexión obxectivo
Número 1) sería exclusivamente como consecuencia do
efeito estatístico, e non porque teñamos avanzado
realmente na converxencia”, salientou Jorquera.
En
todo caso, o coordenador executivo explicitou que o BNG se
ratifica na súa convición de que “non podemos
hipotecar o futuro exclusivamente á recepción de
fundos exteriores”, polo que cómpre “pór
en marcha un Novo Estatuto de Nación e pór en marcha
un novo sistema de financiamento autonómico que dote ao
Goberno do país de suficientes recursos para atender as
necesidades da populación e garantir o desenvolvimento
económico”.
Voltar
a novas
Ver
anteriores
|
|