*ADEGA, CEMMA e FEG demandan da próxima Xunta un compromiso forte polo desenvolvemento sostíbel

Redacción, 07 de xullo 2005. Agardan que entenda a protección ambiental como condición para o desenvolvemento. A Asociación para a Defensa Ecolóxica de Galiza (ADEGA), a Coordenadora para o Estudo dos Mamíferos Mariños (CEMMA) e a Federación Ecoloxista Galega (FEG) demandan ao PSdG-PSOE e ao BNG que o próximo Goberno da Xunta asuma un compromiso forte polo desenvolvemento ecoloxicamente sostíbel, como garantía dun futuro de benestar e de calidade de vida para os galegos e galegas.

ADEGA, CEMMA e FEG agardan que o novo Goberno autonómico, a diferenza do actual, entenda a protección ambiental como unha condición necesaria para o desenvolvemento e non como un obstáculo.

ADEGA, CEMMA e FEG enviaron no inicio da pasada campaña electoral a todos os candidatos á presidencia da Xunta o documento “Un programa para a Terra. Propostas para avanzar cara a unha Galiza sostíbel na próxima lexislatura”. Agora piden a PSdG-PSOE e a BNG que o teñan en conta na definición do programa que guiará a acción da Xunta nos próximos 4 anos.

O “Programa para a Terra” das organizacións ecoloxistas galegas sintetízase en tres eixos:

1) Elaborar unha auténtica Estratexia Galega de Desenvolvemento Sostíbel con ampla participación social. Esta Estratexia ou Axenda 21 Galega debería garantir a integración real de criterios ambientais en todas as políticas autonómicas e procurar a ecoloxización da nosa economía.

2) Ordenar racionalmente o territorio, o que conleva, entre outras cousas, a creación dunha completa rede de espazos naturais protexidos unidos por corredores ecolóxicos, a xestión integrada do litoral, a limitación do crecemento urbano ou a adecuación dos usos agrarios e forestais á vocación dos solos.

3) Mellorar o acceso á información ambiental, impulsar a educación ambiental e fomentar a participación da sociedade civil nos asuntos ambientais.

ADEGA, FEG e CEMMA esixirán á nova Xunta que a próxima sexa a primeira das lexislaturas a favor do desenvolvemento sostíbel e que aborde decididamente os múltiples e importantes problemas ambientais da nosa terra.

Voltar a novas

Ver anteriores