*Poñen en marcha xogos de azar para financiar actividades de normalización lingüística en Euskal Herria

Redacción, 7 de maio 2005. O Kontseilua, ou Consello dos Organismos Sociais do Euskara, é a coordinadora das numerosas organizacións sociais de normalización lingüística do euskara. A súa función é artellar esforzos e tratar de implicar á administración e á potente sociedade civil e económica basca en prol da lingua.

A súa última iniciativa de recadación de fundos transcende á típica rifa de boletos que sortean un premio. O Kontseilua vén de crear unha lotaría que de xeito estábel permitirá obter recursos para poñer en marcha proxectos en favor do euskara.

A ‘Euskal Tonbola’ consistirá en boletos do tipo ‘raña e gaña’ ao prezo dun euro. Poderase adquirir en bares e establecementos públicos e os premios consistirán en: cruceiros polo Mediterráneo, viaxes ao Caribe, reprodutores de MP3, DVD’s, cámaras dixitais, telefones móbeis, ceas ou fins de semana en casas de turismo rural.

Conxuntamente co premio, en cada boleto recóllense enunciados de compromiso individual co euskara.

A ‘Euskal Tonbola’ iniciará a súa andadura o 7 de maio en Buruntza, Urola Behea e Urola Kosta, e en breve abranguerá todos os territorios de Euskal Herria.

*Nova tirada da web d'A Mesa

Voltar a novas

Ver anteriores