*Alberto Núñez Feijoo participará nos 'Almorzos ON/OFF' da Coruña este xoves, 9 de marzo

Redacción 07 de marzo 2006 O Colexio de Xornalistas, por medio da súa demarcación na Coruña, organiza este xoves, 9 de marzo, unha nova edición dos `Almorzos ON/OFF´ coa presenza do Presidente do Partido Popular de Galiza, Alberto Núñez Feijoo. O acto vai comezar ás 9.30 co encontro `OFF´, para colexiados, para dar paso ó `ON´, a rolda de prensa de libre acceso, ás 10.15. Coma sempre, o almorzo celebrarase na sede da Fundación Luís Seoane na Coruña (rúa San Francisco s/n).

Alberto Núñez Feijoo

Alberto Núñez Feijoo foi elexido recentemente presidente do Partido Popular de Galiza. Será o próximo candidato do PP á presidencia da Xunta de Galiza, tralo fin da era protagonizada por Manuel Fraga Iribarne.

É deputado no Parlamento de Galiza tras ter sido cabeza de lista nas últimas eleccións pola provincia de Pontevedra, e portavoz-adxunto do Grupo Parlamentario Popular (desde o 4 de agosto ata a actualidade). No seu partido é membro do Comité Executivo Nacional do Partido Popular e membro do Comité de Dirección do Partido Popular de Galiza.

Durante o último mandato de Fraga Iribarne foi Conselleiro de Política Territorial, Obras Públicas e Vivenda da Xunta de Galiza (desde o 10 de setembro de 2004 ata o 4 de agosto de 2005), cargo que compatibilizou co de Vicepresidente Primeiro do goberno popular. Na anterior lexislatura ocupou tamén o cargo de Conselleiro de Política Territorial (entre xaneiro de 2003 e setembro de 2004).

Anteriormente ocupou diferentes cargos na Sociedade Estatal Correos e Telégrafos, S.A., no Insalud e no Sergas, ademais de ter traballado na Consellería de Agricultura, Gandería e Montes e na de Sanidade e Servicios Sociais.

Almorzos ON/OFF

Para inscribirse nos almorzos pódese chamar ó teléfono 981 93 56 70 ou enviar un correo electrónico a xornalistas@xornalistas.com. O aforo é limitado.

Os `Almorzos ON/OFF´ lévanse realizando desde febreiro de 2005, organizados polo CPXG nas súas demarcacións de A Coruña e Lugo. Nestes encontros cos xornalistas teñen estado persoeiros como Ignacio Ramonet, Teresa Táboas, Anxo Quintana ou José Blanco. O ciclo, que pretende fomentar o diálogo e a análise da actualidade cos seus protagonistas, conta coa colaboración da Fundación Luís Seoane.

O CPXG, entidade de dereito público creada pola lei 2/1999 do Parlamento de Galiza, suma máis de 1.100 colexiados repartidos entre as sete demarcacións coas que conta. Entre os seus obxectivos figura en lugar destacado afondar na mellora das condicións nas que os xornalistas levan a cabo o seu traballo, a defensa profesional dos seus membros e a garantía de independencia e liberdade informativa en beneficio da sociedade galega.

Voltar a novas

Ver anteriores