*Quintana: “ninguén ten dereito a vetar os debates con escusas de mal pagador porque sería tanto como vetar aos cidadáns”

Redacción, 3 de xuño 2005. Confirma que asistirá “sen condicións previas” a todos os que se convoquen polos medios e comprométese como presidente a un debate no Parlamento tras os 100 días de goberno.
O candidato do BNG á presidencia da Xunta, Anxo Quintana, confirmou a súa asistencia aos debates entre candidatos programados pola TVG e por TVE para os días 6 e 15, respeitivamente, e salientou que asistirá “sen ningunha condición previa” a todos os que que convoquen os meios de comunicación por considerar que é “unha demanda dos cidadáns” e un síntoma de “normalidade e modernidade” democrática.

Quintana instou aos outros dous candidatos a non escudarse tras “disculpas de mal pagador”. “Non vale nen falar da urbanidade de uns ou outros, nin tampouco alegar que non vai o outro candidato”. Por contra, o candidato nacionalista foi rotundo ao afirmar que “ninguén ten dereito a veto con escusas de mal pagador porque sería tanto como vetar aos cidadáns. É unha demanda da cidadanía que é a quen debemos responder”.

O candidato nacionalista reiterou, a preguntas dos xornalistas, que asistirá a todos os debates “sen prefixar condicións previas de ningún tipo porque se nos convoca en resposta a unha demanda dos galegos e galegas”.

O líder do BNG comprometeuse, ademais, como presidente da Xunta, a someterse a un debate no Parlamento transcurridos os primeiros 100 días de goberno e adiantou que se someterá a todas as preguntas que queira facer a oposición en sesións de control na Cámara galega. “Quero darme o gosto de permitirlle a Fraga o que el sempre lle negou á oposición: debate, pero con el na oposición”.

Quintana suliñou que a “transparencia e rexeneración democrática” son parte fundamental do cambio galego que propugna o BNG e, neste sentido, comprometeuse a non usar a facultade de designar ao director da CRTVG, propondo que sexa nominado no Parlamento “por consenso entre as tres forzas políticas”.

Asemade, comprometeuse a impulsar a modificación do actual marco legal para incluír as propostas da iniciativa lexislativa popular en relación aos meios públicos de comunicación.

INQUÉRITOS

O candidato nacionalista declinou, máis unha vez, os resultados das diferentes enquisas dadas a coñecer nos últimos días pero salientou que durante a precampaña detectou un interese maioritario de cambio en Galiza, “que debe ser en galego, con acento galego, e non unha derivación de cambios feitos dende fóra.”

Quintana calificou de “moi positiva” a viaxe a América, porque lle deu a oportunidade de ter un “contacto directo” cos galegos da diáspora. Recalcou que Galiza necesita unha relación diplomática “de goberno a goberno” con países como Arxentina e Uruguai, onde a colectividade galega é moi importante, que supere a actual relación de carácter cuase folclórica.

Ao respeito da polémica do voto emigrante, o candidato nacionalista salientou as reiteradas propostas lexislativas impulsadas polo BNG para modificar a lei eleitoral e permitir o voto coas mesmas garantías e transparencia que no interior. “Nin o PP nin o PSOE aceptaron esa modificación”, concluíu.

REUNIÓN CLUB ECONOMÍA IÑAS

Quintana desprazouse até o Clube de Economía Iñás, onde manterá un xantar-coloquio privado cos socios e convidados a esta cita por parte dos responsábeis deste foro, para posteriormente dirixirse a Viveiro, onde participará nun mitin cos candidatos pola provincia de Lugo.

Voltar a novas

Ver anteriores