|
Publicidade
Contacto
Novas
Internacional
Opinión
Arquivo
Ligazóns
Anteriores
|
*Demandan
das forzas políticas unha aposta forte polo desenvolvemento
sostíbel
Redacción,
3 de xuño
2005. A
Asociación para a Defensa Ecolóxica de Galiza
(ADEGA), a Coordenadora para o Estudo dos Mamíferos Mariños
(CEMMA) e a Federación Ecoloxista Galega (FEG) enviaron aos
candidatos á Presidencia da Xunta das principais forzas
políticas o documento “Un programa para a Terra.
Propostas para avanzar cara a unha Galiza sostíbel na
próxima lexislatura”. No comezo da campaña
electoral, as organizacións ecoloxistas galegas demandan ás
forzas políticas unha aposta forte polo
desenvolvemento sostíbel, como garantía dun futuro
de benestar e calidade de vida.
En síntese, o
documento de ADEGA, FEG e CEMMA propón:
1)
Elaborar unha auténtica Estratexia Galega de
Desenvolvemento Sostíbel con ampla participación
social. Esta Estratexia ou Axenda 21 Galega garantirá a
integración real de criterios ambientais en todas as
políticas autonómicas e procurará a
ecoloxización da nosa economía.
2) Ordenar
racionalmente o territorio, o que conleva ao noso entender a
creación dunha completa rede de espazos naturais protexidos
unidos por corredores ecolóxicos, a xestión
integrada do litoral, a limitación do crecemento urbano ou
a adecuación dos usos agrarios e forestais á
vocación dos solos.
3) Mellorar o acceso á
información ambiental, impulsar a educación
ambiental e fomentar a participación da
sociedade civil nos asuntos ambientais.
O documento propón
compromisos en diferentes áreas: xeral, enerxía,
transporte, residuos urbanos, industria, ordenamento do territorio
e urbanismo, litoral, conservación da natureza, augas,
forestal, agricultura e gandería, pesca marítima,
educación ambiental, participación social e reforma
do Estatuto de Autonomía. Destaca algunhas ideas e
propostas que, a xuízo de ADEGA, FEG e CEMMA, é
necesario levar á práctica para facer da próxima
lexislatura a do desenvolvemento sostíbel.
Das
70 propostas enunciadas, salientamos as seguintes:
1)
Estabelecer unha Subdirección Xeral específica para
o fomento da Axenda 21 Local.
2) Aprobar unha auténtica
Estratexia Galega de Cambio Climático, con obxectivos
cuantitativos e prazos por sectores para a redución de
todos os gases con efecto invernadoiro, definindo medidas e
orzamentos. No marco da Estratexia, procurarase a redución
substancial das emisións das centrais térmicas.
3)
Elaborar un Plano de Transporte e Infraestruturas que teña
como prioridades a redución da demanda de transporte, o
fomento da intermodalidade e a transferencia de pasaxeiros e
mercadorías cara aos modos menos contaminantes, así
como demadar ao Goberno central a revisión do Plan Galicia
despois de o someter a unha avaliación ambiental
estratéxica.
4) Revisar o Plan de
Residuos Urbanos para que priorice a estratexia dos tres erres
(redución, reutilización e reciclaxe). Procurar a
redución dun 1% anual da produción de residuos,
reconverter o complexo ambiental de SOGAMA e estabelecer un
calendario para o abandono da incineración antes do
2010.
5) Aplicar un Programa de Fomento da
Ecoeficiencia na industria, identificando para os distintos
sectores obxectivos de redución de recursos empregados por
unidade producida.
6) Elaboración
dunha Lei de costas cun espírito conservacionista e
promoción dunha estratexia de xestión integrada do
litoral que procure o uso sostíbel dos recursos e do
espazo, coordinando as políticas que inflúen na zona
costeira. Neste marco, impulsarase o traslado do complexo de
ENCE-ELNOSA en Pontevedra.
7) Ampliación
da rede de espazos de protección especial até
cubriren o 10% da superficie galega en 2009, incluíndo,
entre outros, os Ancares e o Courel (non se consideran de
protección especial as “Zonas de especial protección
dos valores naturais” e os “Humidais protexidos”).
8)
Aprobación dunha lei para a protección, a
conservación e a mellora dos ríos galegos a partir
da toma en consideración da iniciativa lexislativa popular
pola defensa dos ríos.
9) Revisión
do Plan Forestal para o adecuar aos principios da
sostibilidade e corrixir o desequilibrio a favor da
produción de madeiras de especies de crecemento rápido
en detrimento doutros usos do monte (conservación da
natureza, madeiras e froitos de árbores autóctonas,
gandeiro,...).
10) Elaboración
dun plano para o desenvolvemento da produción agrogandeira
ecolóxica que fixe obxectivos cuantitativos e prazos para o
aumento da superficie e da produción e apoie o
desenvolvemento de circuítos comerciais curtos e o consumo
de produtos ecolóxicos en Galiza.
11) Creación
dunha rede de reservas mariñas de interese pesqueiro.
12)
Impulsar Planos Sectoriais de Educación Ambiental (EA)
referidos a diversos ámbitos co obxecto de
desenvolver a Estratexia Galega de Educación
Ambiental.
13) Reforma inmediata do Consello Galego de
Medio Ambiente e doutros órganos consultivos
(Consello Forestal,...) para os converter en órganos de
participación social representativos, plurais e
influíntes.
14) Crear un Observatorio Galego da
Sostibilidade, independente e de carácter técnico,
para elaborar e difundir información anualmente sobre o
estado do medio ambiente e sobre indicadores de
sostibilidade.
15) Na Reforma do Estatuto, crear a figura
d@ Valedor(a) da Terra e as Xeracións Futuras.
Voltar
a novas
Ver
anteriores
|
|