*O BNG defende que avanzar no autogoberno é unha condición necesaria para que Galiza converxa co estado

Redacción 03 de marzo 2006 “Se Galiza diverxeu co Estado durante a era Fraga foi pola incompetencia do PP, mais tamén pola insuficiencia do marco estatutario actual”, afirma Jorquera. No encontro co Colexio de Economistas de A Coruña, Jorquera defende que no contexto do Novo Estatuto se dean pasos para que as caixas de aforro invistan os seus fundos en promover a economía produtiva.
Avanzar no autogoberno e superar as insuficiencia do marco estatutario actual son condicións necesarias para que a economía galega comece a converxer coa do Estado, asegurou esta mañá na Coruña o coordenador executivo do BNG, Francisco Jorquera.

Jorquera expresouse nestes termos en declaracións aos xornalistas logo de, na compaña do portavoz nacionalista no Parlamento Carlos Aymerich, ter mantido un encontro coa equipa de dirección do Colexio de Economistas de A Coruña, representada polo seu decano, Roberto Pereira; o vicedecano Venancio Salsinas; e o secretario Augustín Fernández.

“As causas de que Galiza diverxese co Estado durante os 16 anos do Goberno Fraga, de que decrecese a respecto do promedio estatal, hainas que buscar na incompetencia do PP, mais tamén na insuficiencia do marco estatutario actual que non facilita as ferramentas suficientes para garantir o pleno desenvolvimento económico do país”, afirmou Jorquera, quen asegurou que esta reflexión foi un dos argumentos que centrou o encontro cos economistas.

“Precisamos, indicou Jorquera, de máis competencias para planificar a nosa economía, para apoiar os sectores produtivos, para procurar a reindustrialización do país e o investimento en produtos de alto valor engadido”, acrecentou o coordenador executivo.

O Novo Estatuto é, portanto, unha “oportunidade histórica” para que o país se dote de novas ferramentas que lle fornezan “o progreso material que a nosa sociedade demanda”. Ferramentas, dixo, como as dunhas caixas de aforro “que invistan os seus fundos na economía produtiva e que realmente cumpra a función social para as que foron criadas”.

Jorquera enfatizou tamén que o BNG é “a única forza política que ten apresentado xa unha proposta formal con texto articulado de Novo Estatuto” e a única que ten aberto unha rolda de contactos coa sociedade para apresentala e para “recoller suxestións que eventualmente podamos defender como proprias no proceso que agora se abre no Parlamento”.

Voltar a novas

Ver anteriores