Publicidade
Contacto
Novas
Internacional
Anteriores
Opinión
Foro
Arquivo
Ligazóns
*Anxo
Quintana propón unha cesta fiscal propia e a blindaxe da
inversión estatal para Galiza
Redacción
03 de febreiro 2006
O vicepresidente do goberno galego, Anxo Quitana,
incidiu onte na necesidade de que o marco competencial reforzado
que traerá o novo Estatuto vaia acompañado dun
modelo de financiamento axeitado “para que esas competencias
reforzadas non se convertan en problemas reforzados”. Na súa
opinión, “non pode haber autonomía política
sen autonomía financeira” e neste camiño
propuxo coma dous obxectivos a conseguir na negociación
unha cesta de tributos propios e a blindaxe do investimento do
Estado en Galiza.
Quintana
asegurou que o único xeito de conseguir o mellor para o
país é “articular unha única voz en
Galiza que se faga forte en Madrid, xa que non temos un peso
demográfico grande nin unha participación importante
no Produto Interior Bruto estatal para impoñernos por esa
vía”.
Nese camiño, “o que
esperan de nós os cidadáns galegos é que
sexamos capaces de chegar a puntos de encontro partindo dende
posicións diferentes, como é lóxico nas
sociedades plurais coma a galega”. Para isto, Quintana
convidou ás forzas políticas galegas a “baixarmos
do discurso grandilocuente ás cuestións concretas”.
Para o vicepresidente, “hai cuestións que agora temos
que decidir, e cada un debe marcar a súa postura”.
Posturas concretas
Entre estes temas, aludiu
ao recoñecemento nacional de Galiza: “Eu creo que
Galiza é unha nación e creo que chegou o momento de
recoñecelo”. Quintana amosouse convencido de que, se
neste momento non se procede a este recoñecemento ao mesmo
nivel que Euskadi e Cataluña, Galiza vai perder estatus.
“Polo tanto, o que non queira facer ese recoñecemento
terá que explicarlle aos cidadáns galegos que queren
para Galiza un recoñecemento inferior ao que van ter
Euskadi e Cataluña”, advertiu.
Quintana dixo
que tamén chegou o momento de ir a cuestións
concretas no tema do financiamento. Neste campo, a súa
proposta pasa por reclamar unha cesta de tributos propios para
Galiza: “O que recibiu Cataluña nese sentido non nos
vale a nós, temos que fixar a nosa propia”. Falou
tamén de definir como vai participar Galiza nos mecanismos
de compensación interterritorial, conseguindo que se teñan
en conta criterios coma a dispersión da poboación
para calcular o custo dos servizos. O terceiro alicerce a defender
para Quintana é a blindaxe do investimento do Estado en
Galiza: ”Temos que conseguir investimento blindado para que
cada ano non esteamos pensando no que se nos vai dar”.
Para o vicepresidente “iso chámase débeda
histórica”, unha débeda que cifra en 21.000
millóns de euros a pagar en oito anos a razón de
2.600 millóns de euros por ano. Tras expoñer as súas
propostas, Quintana pediu que “os demais xoguen coa mesma
claridade, porque se xogan coa mesma claridade seguro que imos
chegar a puntos de encontro”.
Relacións
bilaterais co Estado
En materia de financiamento, o
vicepresidente da Xunta tamén aludiu á necesidade de
“deixar a idea que queren vender de Galiza coma un país
pobre, sen recursos, que só pode vivir se ten a
solidariedade do Estado”. Quintana está convencido de
que Galiza ten posibilidades e recursos “e agora hai unha
oportunidade para demostralo”. Para iso, “Galiza tense
que valer por si mesma”. “Se outros foron capaces de
ter unha relación bilateral co Estado, como fixo Cataluña
para defender o seu modelo de financiamento, pois nós temos
agora que aproveitar a oportunidade e reclamar tamén esa
relación bilateral para facer o noso propio modelo de
financiamento”, engadiu. Na súa opinión, “o
modelo de Euskadi, o de Cataluña ou o calquera outro non
nos serve a nós, temos que facer o noso propio modelo e
negocialo co Estado, e polo tanto esa relación de
bilateralidade é fundamental neste momento”.
Por
outra parte, Quintana falou da importancia de que Galiza teña
posibilidade de representación propia no ámbito
internacional. Cualificou esta cuestión coma “fundamental
para o noso futuro”, xa que “Galiza precisa defender
os seus intereses alí onde se decide” e considera que
“debe formar parte das competencias que se recollan no novo
Estatuto”.
En canto ao clima do debate estatutario,
amosouse convencido de que “todos temos moito que aportar”.
Para el “só hai unha condición, e é que
cando definamos os intereses de Galiza o fagamos pensando en
Galiza, nos galegos e nas galegas, e non o que se di dende
Madrid”. “Se o facemos así, os acordos serán
bos para Galiza”, asegurou.
Voltar
a novas
Ver
anteriores