|
Publicidade
Contacto
Novas
Internacional
Opinión
Arquivo
Ligazóns
Anteriores
|
*Quintana
afirma en Montevideo que Fraga e Rajoy atacan ao BNG porque son
conscientes de que será o nacionalismo quen faga perder a
maioría ao PP en Galiza
Redacción,
2 de xuño
2005.
Nun mítin no Teatro Bambalinas de Bos Aires, Quintana
reivindica para o BNG o legado político do Partido
Galeguista: “Castelao sabía que Galiza precisaba de
forzas políticas proprias para ter futuro”.
O candidato do BNG á presidencia do Goberno
galego, Anxo Quintana, salientou en declaracións aos
xornalistas á súa chegada a Montevideo que as
críticas de Manuel Fraga e Mariano Rajoy á formación
nacionalista obedecen “a que están obsesionados con
nós e están obsesionados con nós porque saben
que seremos nós, co noso avanzo eleitoral, os que retiremos
a Fraga do poder. Nós, co noso avanzo eleitoral, seremos os
que faremos perder ao PP
a súa maioría absoluta”.
Quintana
considera que Mariano Rajoy pretende “perpetuar un Goberno
inútil en Galiza” cun Fraga arrodeado de “catro
nenos de Papá” aos que poder dar “ordes desde
Madrid”. O candidato nacionalista, que hoxe continuou a súa
viaxe en América, en Montevideo, acusou a Fraga de utilizar
os emigrantes “como pura mercadoría eleitoral”.
“Ve neles só un xacimento de votos, non a un conxunto
de cidadáns aos que hai que garantir a súa plenitude
de direitos”.
Entre
as propostas para a diáspora, Quintana anunciou a súa
decisión de pór en marcha o Instituto Castelao “como
embaixada de Galiza no mundo”, que estaría deseñada
como unha rede de centros estábeis para espallar a cultura
galega no mundo, para Galiza ter unha “representación
internacional estábel que sirva para atender as
colectividades galegas residentes no exterior”.
Mítin
en Bos Aires
Antes de
se desprazar a Montevideou, Quintana fechou a súa xornada
en Bos Aires cun mítin no Teatro Bambalinas ao que
asistiron máis de 500 persoas e no que o candidato
nacionalista recalcou a débeda histórica que Galiza
ten cos seus emigrantes. E que asumiu como compromiso persoal
porque, explicou, “eu tamén son neto de emigrantes e
o meu pai naceu en Cuba”. O líder do BNG
comprometeuse a substituír “a caridade mal entendida
que desenvolve a Xunta de Galiza na diáspora por unha
asistencia sociosanitaria que equipare os dereitos dos galegos no
exterior aos que desfrutan os residentes na Galiza”.
O
candidato nacionalista salientou que Galiza precisa un “cambio
galego” frónte á fallida teoría dos
“Gobernos Amigos”. “Castelao”, explicou,
“creou o Partido Galeguista porque quería defender a
Galiza e para facelo non ingresou nen no PSOE nen en nengunha das
organizacións de dereitas de entón. Castelao sabía
que o país necesitaba unha forza política propria
para ter futuro. E iso é hoxe o BNG”.
Crecente
apoio ao BNG
A perguntas de xornalistas, Quintana
declinou facer valoracións sobre a enquisa do CIS, mais
salientou que fai e percorre 10.000 quilómetros ao mes por
toda Galiza e que isto lle ten servido para constatar “o
crecente apoio ao BNG ao longo do último mes”. O
líder do BNG ve a unha militancia “tremendamente
motivada e ilusionada” e a unha cidadanía con moitas
gañas de ter por vez primeira na historia “un
presidente nacionalista”. “Sempre estiven convencido
do éxito eleitoral do BNG e as miñas sensacións
estanse confirmando esta precampaña”,
engadiu.
Voltar
a novas
Ver
anteriores
|
|