*Quintana, no arranque de precampaña do BNG: “o cambio en Galiza é xa irreversíbel e será un cambio galego porque a xente quer respecto para o seu país”

Redacción, 2 de abril 2005. “Imaxinai o gosto que vai dar xubilar democraticamente a Fraga e que o fagamos nós”. O candidato do BNG á presidencia da Xunta, Anxo Quintana, afirmou o sábado pola tarde no mítin de arranque de precampaña que “o cambio en Galiza é xa irreversíbel e será un cambio galego porque a xente quer respecto para o seu país”.

Nun ateigadísimo Salón de Convencións do Hotel Araguaney, co seu aforo desbordado e xente nos corredores a ollar o mítin através dunha pantalla de vídeo, o líder nacionalista manifestou a súa convición de que “non hai cambio real sen respecto para Galiza e non haberá respecto para Galiza se non traemos o cambio galego a este país”.

“Estamos ás portas dun cambio histórico”, afirmou Quintana, “o país terá que decidir se quer ser unha rexión triste e sumisa ou un país forte e respectado no conxunto do Estado e da Unión Europea. A escolla é clara e sei que a xente o que quer é o cambio galego. Existe unha clarísima maioría social que o quer é un presidente que se faga respectar e un Goberno que poña os intereses desta nación por enriba de todo”.

Quintana debullou o que o BNG entende por cambio galego. “Cambio galego significa renovación e rexeneración democrática. Todos os que estamos aquí temos a sensación de que este país leva a ser gobernado demasiado tempo polos mesmos. Non me refiro aos últimos quince anos. Refírome aos últimos 70 anos. A imensa maioría dos galegos e das galegas nunca tivo a oportunidade de ver no poder algo próximo a eles. O cambio galego consiste precisamente niso, en que a xente sinta o poder como algo propio”.

Tamén significa a “redistribución de oportunidades” a favor dos “que están menos protexidos na nosa sociedade”. “Eis temos os 200.000 mozos e mozas galegos que tiveron que emigrar durante a era Fraga. Un Goberno democrático o máis digno que pode facer é que os direitos fundamentais das persoas se cumpran, e un deles é o direito a viver e a traballar na propria terra”, afirmou Quintana.

DICERLLE A VERDADE Á XENTE

O cambio galego implica tamén “dicerlle a verdade á xente”. “Dicer que gastaremos menos en cemento, en estradas e pistas que non levan a ningures, en pavillóns de deportes feitos onde non habita xente. Imos facer que o centro de gravidade da acción do Goberno galego pase do cemento á política social. Non podemos continuar a ser o país do Estado con menos prazas nos centros xeriátricos públicos, sen atención domiciliaria, sen ter cobertura universal para os nenos e nenas de 0 a 3 anos nunha rede de gardarías”, acrecentou.

E o cambio galego supón sobre todo garantir que Galiza sexa respectada. “Necesitamos un presidente que fale de ti a ti ao presidente do Goberno. Non un presidente que vaia á Moncloa a cuadrarse como un cabo furriel e a se pór ás ordes do presidente español. Mais tampouco un presidente que vaia a Madrid a armar barullo só polo feito de ser dunha cor política distinta. Necesitamos un presidente que defenda os intereses do país con firmeza, mais que teña tamén capacidade de interlocución. E, sobre todo, necesitamos un presidente que sexa quen de unir e de liderar a nosa sociedade, non de criar confrontación no seu seo”, proclamou Quintana.

O líder do BNG criticou con dureza a Fraga. “É un candidato escondido. Leva 200 horas escondido. E vou contar as horas en que continúe agachado detrás do telón. É un candidato que non quer debater. E Fraga non está en condicións de debater porque non está en condicións de gobernar”, dixo antes de agoirar que a próxima ocupación de Fraga será a de “ser xefe da oposición”. “Imaxinai o gosto que vai dar xubilar democraticamente a Fraga e que o fagamos nós”, engadiu.

Na súa intervención de abertura do mítin, a número dous do BNG ao Parlamento Galego por A Coruña, Ánxela Bugallo, detallou a alternativa nacionalista ao PEIT e cifrou en 21.000 millóns de euros os investimentos que precisa o noso país para a modernización das súas infraestruturas e para a vertebración do territorio.

Voltar a novas

Ver anteriores