Contacto
*O XXX Trofeo de Campo a Través de San Miguel de Oia espera reunir a máis de 1.200 atletas
· O torneo disputarase o domingo 18 de marzo no parque forestal de San Miguel de Oia
Redacción 15 de marzo de 2007 A trinta edición do Trofeo de Campo a Través de San Miguel de Oia, que se celebrará o próximo día 18 de marzo no parque forestal de San Miguel de Oia, ten como obxectivo conseguir xuntar a máis de 1.200 participantes entre todas as categorías.
Hoxe tivo lugar o acto de presentación do trofeo, ao que asistiu o director xeral para o Deporte, Santiago Domínguez Olveira; o presidente da Sociedade Deportiva Atletismo San Miguel de Oia, Gilberto Costas, e a concelleira de Distritos, Marisol Polo.
No transcurso da rolda de prensa, o director xeral destacou que o obxectivo fundamental desta proba é "fomentar a participación e desta forma a práctica deportiva polo que é a nosa obriga estar ao lado dos organizadores. O atletismo, o deporte rei, é sinónimo de sacrificio, de esforzo, tanto dos deportistas como dos clubs e por iso estamos encantados de poder traballar en colaboración coa Sociedade Atletismo San Miguel de Oia, que leva moitos anos demostrando a súa valía".
Pola súa parte, Costas agradeceu o apoio da Dirección Xeral para o Deporte, "dende o momento no que lle presentamos a memoria do proxecto, apostaron por nós de forma decidida".
As carreiras comezarán ás 10 da mañá coa proba alevín masculino e a última saída terá lugar as 13.25 horas coa disputa da proba de pitufos feminino (125 metros). A carreira popular, na que se espera unha importante participación terá lugar ás 12.15 horas e será sobre un percorrido de 7.770 metros (4 voltas no circuíto). Haberá atletas de toda Galiza e Portugal, ademais de deportistas procedentes de Asturias, Castela e León, Euscadi e outras comunidades.
Nesta trinta edición o obxectivo dos organizadores é lograr un éxito de participación. Hai dous anos contaron con 1.100 atletas inscritos, pero o ano pasado descendeu de forma importante, así que para a presente edición confían en lograr entre 1.200 e 1.500 persoas e haberá multitude de premios e regalos para os participantes: "Imos dar máis de trescentos regalos e haberá 1.200 medallas para todos os participantes, rematen ou non a carreira", indicou Gilberto Costas. Até agora xa contan con un importante número de confirmacións que continuarán até o día da proba. Por último, o presidente do club organizador agradeceu a colaboración dos veciños e veciñas de San Miguel que "acollerá aos participantes de 5 a 15 anos".
Voltar á Portada
Ver anteriores
