Contacto
*Fillos de Galiza proclama a 'Nación Mundial Galega'
· Defenden que o pobo galego espallado polo mundo constitúe unha nación non limitada xeograficamente a territorio ningún, nin sequera a Galiza
Redacción 01 de marzo de 2007 Segundo se pode ler na proclamación que fixeron pública hoxe en Internet no enderezo NacionMundialGalega.info, os responsables do principal portal da diáspora galega pretenden un recoñecemento para esta "nación" e o seu "dereito a pervivir na Historia como feito singular social e cultural sen comparanza agás con algúns pobos máis da Humanidade", como o xudeu ou o irlandés.
Esta declaración dos galegos en conxunto como nación xorde
nun intre en que a definición de Galiza como tal demostrou ser un
atranco polo de agora insalvábel para a reforma do Estatuto de
Autonomía. Diante do debate encol se Galiza é ou non é unha nación,
a Asociación Cultural Fillos de Galiza opta por definir como tal
ao conxunto dos galegos con independencia de onde residan ou mesmo
do seu grado de parentesco. "Non queremos limitar a condición de
galegos aos que naceran alá, nin aos seus fillos nin aos seus netos.
Para nós quen queira considerarse galego ou galega, ten dereito a
formar parte desta nación mundial", explica Manuel Casal Lodeiro,
presidente de Fillos de Galiza, facendo unha indirecta referencia ao
asunto do recoñecemento legal da nacionalidade dos descendentes de
españois que está pendente de reforma por parte do goberno
socialista.
En Fillos mesmo crearon unha nova bandeira a partir da
bandeira de Galiza, á cal engadiron unha segunda franxa azul
para representaren "a outra metade do pobo galego", e unha terceira
cor, a negra, que simboliza o trauma histórico da emigración
e que é, segundo afirman, o que dá orixe a esta "nación" que "existe
tanto dentro como fóra" dos límites territoriais e administrativos
da súa terra de orixe.
Voltar á Portada
Ver anteriores
