Contacto
| Publicidade:
|
Redacción 23 de maio de 2007 O portavoz nacional do BNG, Anxo Quintana, pediu onte á mocidade galega "un voto masivo o día 27 ao BNG para deixar atrás as políticas antigas que só trouxeron paro e emigración". Quintana fixo estas declaracións en Lugo durante o mitin central do candidato do BNG á alcaldía da cidade da muralla, Xosé Anxo Laxe. Pediu ademais, en alunisón a unha foto dos lideres do PP na estación do ferrocarril de Ourense, que o 27 lle mercasen un billete ao PP para "mandalos para casa".
O líder do BNG asegurou que "é necesario que a mocidade galega se mobilize este domingo para que as politicas de cambio real que está a implementar o BNG na Xunta de Galiza se trasladen tamén aos concellos, deixando atrás dunha vez por todas as políticas antigas que lle negan o futuro á xente nova deste país".
Catro compromisos fundamentais dende os concellos do BNG coa mocidade
A este respeito, Anxo Quintana subliñou que "o BNG fala como os mozos e mozas de Galiza: claro e con compromiso".
Así, o portavoz nacional lembrou os catro compromisos fundamentais coa mocidade que se porán en marcha nos concellos gobernados polo BNG.
En primeiro lugar o apoio ás políticas de emprego mediante o investimento de 3 de cada 10 € dos investimentos do concello; en segundo lugar compromiso para facilitar o acceso á vivenda mediante a construción de 1.000 vivendas de aluguer para a xente nova nos cascos históricos durante os próximos catro anos e mediante a construción de vivenda protexida.
Por último, Anxo Quintana comprometeuse cos mozos e mozas de Galiza a impulsar alternativas de lecer, como a rede galega de locais de ensaio, e a apoiar o deporte de base.
Voltar á Portada
Ver anteriores
Publicidade:
