Novas

*Carlos Callón: “Se non rectifica, ao Valedor só lle quedan dúas opcións: ou renunciar ou ser cesado por incumprimento das súas obrigas”
· O presidente da Mesa sinalou que non se descartan mobilizacións no caso de que Benigno López non aclare a súa postura sobre o galego

Publicidade:

Redacción 13 de agosto de 2007 Case dúas semanas despois de que A Mesa pola Normalización Lingüística pedise publicamente ao novo Valedor do Pobo, Benigno López, que rectificase as súas declaracións nas que cuestionaba o uso do galego no ensino e na xustiza realizadas en entrevistas a distintos medios de comunicación, este aínda non fixo ningún tipo de aclaración ao respecto.

Por iso, o presidente da Mesa, Carlos Callón, asegurou esta mañá en conferencia de imprensa que “se o novo Valedor non rectifica ou aclara se ten algunha fobia contra o galego que o incapacite para o cargo, só lle quedan dúas opcións, segundo o propio regulamento da institución que representa: ou renunciar ou ser cesado por grave incumprimento das obrigas do seu cargo”. Callón asegurou que “é evidente que as incumpre, cando fai algo que está a 180 graos do que debería ser o seu papel”.

O dirixente da asociación cidadá en defensa da lingua explicou que A Mesa xa solicitou unha reunión co propio Valedor, ao que quixo recordar a través dos medios cal é a situación real dos dereitos lingüísticos en Galiza, que, dixo, se pode “constatar non só a través das propias denuncias que chegan á Mesa, senón tamén a través de órganos tan solventes como o Comité de Ministros do Consello de Europa”. Callón pediulle que faga respectar os dereitos lingüísticos, e recomendoulle á cidadanía que non deixe de utilizar a institución do Valedor cando vexa estes dereitos vulnerados.

“Agardamos a que se produza a entrevista con Benigno López, se non hai unha rectificación entón teremos que reunirnos coa presidenta do Parlamento e cos grupos parlamentares que elixiron ao Valedor, o seguinte paso é mobilizar á cidadanía”, manifestou o presidente da Mesa. Callón agradeceu as mostras de repulsa contra as declaracións de Benigno López chegadas desde diversos ámbitos, aínda que ao mesmo tempo puxo o acento sobre o silencio doutras institucións “das que non sabemos a súa opinión, a pesar de que se lles solicitou desde os medios de comunicación, como a Real Academia Galega”. “Agardamos que na próxima reunión do seu plenario traten o tema e se pronuncien oficialmente”.

Défices na atención en galego das forzas de seguridade
Carlos Callón tamén se referiu na conferencia de imprensa desta mañá á recente polémica entre distintas asociacións de gardas civís pola atención aos usuarios en galego. O presidente da Mesa dixo que “afortunadamente a maioría si que defenden a normalización lingüística, aínda que reclaman unha maior formación para poder usar o galego con corrección e fluidez, algo que ten que garantir a Xunta de Galiza”. “Desde A Mesa agardamos que os superiores non toleren nin desobediencias nin chamamentos á desobediencia, porque é insostíbel nun estado democrático e de dereito que un garda civil incumpra a lei”, manifestou Callón.

O dirixente da Mesa asegurou que “continuamos con défices de normalización noutros corpos, como nalgunhas policías locais, ou na policía nacional”. Lembrou que el mesmo se viu imposibilitado a presentar unha denuncia en galego perante a policía nacional.

Voltar á Portada
Ver anteriores