Novas

*500 persoas concéntranse diante do Parlamento para lembrar aos deputados o seu deber de promoveren o galego
• Convocado pola Mesa pola Normalización tamén se sumaron CIG-Ensino, Galiza Nova, Comités e CNT a este acto simbólico fronte ao Parlamento no que se defendeu o dereito ao ensino en galego

Publicidade:

Redacción 01 de abril de 2009 Arredor de cincocentas persoas, segundo os convocantes, concentráronse esta mañá fronte ao Parlamento de Galiza, en Santiago de Compostela, para recordarlles ás novas deputadas e deputados o seu deber estatutario de potenciaren o emprego do galego e de desenvolveren o estabelecido por acordos unánimes da propia Cámara que seguen sen se aplicar.

Con este acto simbólico, convocado pola Mesa pola Normalización Lingüística e secundado por organizacións como a CIG-Ensino, a organización estudantil Comités, Galiza Nova ou a CNT, quérese reivindicar que nesta nova lexislatura se adopten as medidas precisas en defensa da nosa lingua e non se produzan involucións na garantía dos dereitos lingüísticos, tanto individuais como colectivos.

A derrogación do decreto 124/2007 de promoción do galego no ensino anunciada polo futuro presidente da Xunta, Alberto Núñez Feijóo, centrou boa parte das consignas coreadas na concentración. O presidente da Mesa, Carlos Callón, recordou en declaracións aos medios de comunicación que o actual decreto conta co apoio “do Consello Escolar de Galiza, de todas as organizacións estudantís, da federación pública de asociacións de nais e pais, da federación de centros católicos, dos sindicatos que representan o 90% do profesorado e dos movementos de renovación pedagóxica” e advertiulle a Feijóo que “non pode caer na tentación de substituílo unilateralmente”.

A concentración desta mañá é a primeira dunha serie de accións nas rúas para evitar a “involución lingüística que anuncia o PP” e que desembocarán na manifestación convocada pola Mesa para o 17 de maio, a cal, segundo o presidente da asociación en defensa da lingua, “ten que ser histórica”. Callón, que xa anunciou en días pasados que a organización vai solicitar entrevistas cos novos responsábeis gobernamentais unha vez que tomen posesión, reclama do Partido Popular “unha postura construtiva coa lingua e coa cultura do país”.

Voltar á Portada
Ver anteriores